ក្រុមហ៊ុនក្រេឌីត ប្យួរ៉ូ (ខេមបូឌា) ខូ អិលធីឌី (ស៊ីប៊ីស៊ី) គឺជាក្រុមហ៊ុនឈានមុខគេ ក្នុងការផ្តល់នូវសេវាព័ត៌មានហិរញ្ញវត្ថុ ឧបករណ៍វិភាគទិន្នន័យ និង របាយការណ៍ឥណទាន ទៅដល់ស្ថាប័នហិរញ្ញវត្ថុទាំងអស់ នៅក្នុងប្រទេសកម្ពុជា។
ដោយមានការជ្រោមជ្រែង ពីធនាគារជាតិនៃកម្ពុជា សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និង សាជីវកម្មហិរញ្ញវត្ថុអន្តរជាតិ ការិយាល័យឥណទានឯកជនលំដាប់ពិភពលោក ត្រូវបានបង្កើតឡើង ដើម្បីឆ្លើយតបទៅនឹងតម្រូវការ របស់ធនាគារជាតិ ក្នុងការដំណើរការទីផ្សារឥណទាន ដែលត្រឹមត្រូវ មានតម្លាភាព និង អាចគ្រប់គ្រងបានល្អ ហើយអាចជួយគាំទ្រដល់ការរីកចម្រើន របស់សេដ្ឋកិច្ចជាតិ។ គណ:កម្មការរបស់ការិយាល័យឥណទាន ត្រូវបានបង្កើតឡើងក្នុងគោលបំណង បង្កើតក្រុមហ៊ុន ការិយាល័យឥណទានកម្ពុជា ហើយនៅខែមិថុនា ឆ្នាំ២០១០ គណៈកម្មការនេះ បានរៀបរាងសំណើរ ក្នុងការជ្រើសរើសដៃគូ។ ប្រកាសស្តីពីការចែករំលែកព័ត៌មានឥណទាន ត្រូវបានអនុម័តក្នុងខែឧសភា ឆ្នាំ២០១១ ហើយបន្ទាប់ មកការិយាល័យឥណទានកម្ពុជាបាន ចាប់ផ្តើមប្រតិបត្តិការជាផ្លូវការនៅថ្ងៃទី ១៩ ខែ មីនា ឆ្នាំ ២០១២។
ស៊ីប៊ីស៊ី ជួយដល់អតិថិជន និង សមាជិករបស់ខ្លួនទាំងអស់ ក្នុងការគ្រប់គ្រងហានិភ័យ និង ធ្វើការសម្រេចចិត្តបានឆាប់រហ័ស។ តាមរយៈការប្រើប្រាស់ផលិតផល ឧបករណ៍របាយការណ៍ឥណទាន យើងជម្រុញការយល់ដឹងអំពីអតិថិជនទូទៅ ទីផ្សារ និង សេដ្ឋកិច្ច។ យើងជួយស្ថាប័នជាសមាជិក ក្នុងការស្វែងយល់ពីអតិថិជនរបស់ស្ថាប័ននោះ និងកសាងទំនាក់ទំនងកាន់តែប្រសើរឡើងជាមួយអតិថិជន។
បន្ថែមពីលើនេះ ស៊ីប៊ីស៊ី ក៏ជួយលើកស្ទួយសេ្ថរភាពហិរញ្ញវត្ថុ តាមរយៈការផ្តល់នូវទិន្នន័យដែលត្រឹមត្រូវ និង រហ័សទាន់ចិត្តទៅដល់អតិថិជន និង វិស័យហិរញ្ញវត្ថុទាំងមូលដែល អាចជួយពួកគេក្នុងការគ្រប់គ្រង រាល់ទិដ្ឋភាពហិរញ្ញវត្ថុរបស់អាជីវកម្មពួកគេ។ យើងក៏ជួយដល់ អាជីវកម្មក្នុងប្រទេសកម្ពុជា ក្នុងការគ្រប់គ្រងហានិភ័យឥណទាន ការពារពីការលួចបន្លំ និង ជួយធ្វើការសម្រេចចិត្តបានលឿន។
ស៊ីប៊ីស៊ី ក៏ជួយដល់អតិថិជនទូទៅ ក្នុងការពិនិត្យមើលរបាយការណ៍ឥណទានរបស់ខ្លួន ដើម្បីធានាបានថា ពួកគេអាចទទួលបានឥណទាន។ មិនតែប៉ុណ្ណោះ យើងក៏ជួយដល់អតិថិជន ក្នុងការការពារខ្លួន ពីការលួចបន្លំអត្តសញ្ញាណផងដែរ។
គិតត្រឹមខែធ្នូ ឆ្នាំ ២០២២ ស៊ីប៊ីស៊ី មានសមាជិកសរុប ១៨៥ ស្ថាប័ន រួមបញ្ចូលទាំង គ្រឹះស្ថានធនាគារ គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យា និង ប្រតិបត្តិករឥណទានជនបទ។
ក្រុមហ៊ុន ក្រេឌីត ប្យួរ៉ូ ខេមបូឌា គឺជាក្រុមហ៊ុនឈានមុខគេ ក្នុងការផ្តល់នូវសេវាព័ត៌មានហិរញ្ញវត្ថុ ឧបករណ៍វិភាគទិន្នន័យ និង របាយការណ៍ឥណទាន ទៅដល់ស្ថាប័នហិរញ្ញវត្ថុទាំងអស់ នៅក្នុងប្រទេសកម្ពុជា។