លោក អ៊ាន់ ពលី គឺជាធនធានដ៏មានតម្លៃរបស់អង្គភាពក្នុងនាមជានាយកនាយកដ្ឋានព័ត៌មានវិទ្យា អស់រយៈពេលជាង ៦ ឆ្នាំមកហើយ។ ជាមួយនឹងបទពិសោធន៍ជាង ១៥ឆ្នាំ នៅក្នុងវិស័យធនាគារ លោក ពលី នាំមកនូវទស្សនវិស័យដ៏រឹងមាំ និងវែងឆ្ងាយចំពោះតួនាទីនេះ។ លោកបានបញ្ចប់ ថ្នាក់បរិញ្ញាបត្រផ្នែកវិទ្យាសាស្ត្រកុំព្យូទ័រ ពីសាកលវិទ្យាល័យភូមិន្ទភ្នំពេញ និងបរិញ្ញាបត្រជាន់ខ្ពស់ ផ្នែកវិទ្យាសាស្ត្រកុំព្យូទ័រពីរាជបណ្ឌិត្យសភាកម្ពុជា ហើយបានទទួលវិញ្ញាបនបត្រជាច្រើនពីស្ថាប័នល្បីៗដូចជា MIT, Harvard, និង Berkeley School of Information។

ក្នុងនាម ជានាយកនាយកដ្ឋានព័ត៌មានវិទ្យា លោក ពលី ទទួលបន្ទុកដឹកនាំទិសដៅយុទ្ធសាស្ត្ររបស់ នាយកដ្ឋាន និងត្រួតពិនិត្យលើការដាក់ពង្រាយប្រព័ន្ធព័ត៌មាន និងបណ្តាញនានា។ ជំនាញរបស់គាត់ក្នុង បច្ចេកវិទ្យាបានដើរតួយ៉ាងសំខាន់ក្នុងការ ជំរុញការផ្លាស់ប្តូរបច្ចេកវិទ្យាត្រឹមត្រូវនៅក្នុងស្ថាប័ន។

ក្រៅពីជំនាញបច្ចេកទេស លោក ពលី ជាអ្នកដឹកនាំ និងអ្នកធ្វើ ការងារជាក្រុមដ៏ពូកែម្នាក់។ គាត់មានសម្ថភាព ក្នុងការប្រាស្រ័យទាក់ទងជាមួយភាគីពាក់ព័ន្ធ និងនាយកដ្ឋានផ្សេងៗ ក្នុងការ គ្រប់គ្រងគម្រោងប្រកបដោយជោគជ័យ និងបង្កើនប្រសិទ្ធភាព ក្នុងនាយកដ្ឋាន។ យើងកោតសរសើរ ចំពោះការលះបង់ ការរួម ចំណែក និងការចែករំលែករបស់គាត់ ចំពោះភាពជោគជ័យនៃនាយកដ្ឋានព័ត៌មានវិទ្យា។

នាយកដ្ឋានប្រតិបត្តិការ ជានាយកដ្ឋាន ដ៏សំខាន់មួយ ដែលទទួលខុសត្រូវចំពោះ សមាជិកទាំងអស់របស់ក្រុមហ៊ុន និងរក្សាគុណភាពទិន្នន័យក្នុងប្រព័ន្ធចែករំលែកព័ត៌មានឥណទាន ដែលប្រមូលបាន ពីគ្រឹះស្ថានជាសមាជិក ក៏ដូចជាចែករំលែកជូនសមាជិក ប្រើប្រាស់នូវរបាយការណ៍ឥណទាន ដែលមានភាពត្រឹមត្រូវ បើកចំហរ និងតម្លាភាព។ នាយកដ្ឋាននេះ ដឹកនាំដោយ លោក ខុម ច័ន្ទតារា ដែលមានបទពិសោធន៍ការងារជាង ១៣ឆ្នាំ ក្នុងវិស័យធនាគារ និងហិរញ្ញវត្ថុ។

លោក ខុម ច័ន្ទតារា បានចូលបម្រើការងារនៅក្នុងក្រុមហ៊ុន ស៊ីប៊ីស៊ី ជានាយករងប្រតិបត្តិការនៅក្នុងខែមករា ឆ្នាំ២០១៩ ហើយត្រូវបានតម្កើងតំណែងជានាយកប្រតិបត្តិការ នៅក្នុងខែមិថុនា ឆ្នាំ២០២១។ មុននឹងចូលបម្រើការ នៅក្នុងក្រុមហ៊ុនលោកធ្លាប់ជាប្រធានផ្នែកស្រាវជ្រាវ និងអភិវឌ្ឍន៍ នាយករងនាយកដ្ឋានផែនការ និងយុទ្ធសាស្រ្ត និងជានាយករងនាយកដ្ឋានប្រតិបត្តិការ ទទួលខុសត្រូវលើការស្រាវជាវទីផ្សារ និងអភិវឌ្ឍផលិតផល ការបែងចែកបណ្តាញសាខា ការគាំទ្រប្រតិបត្តិការរបស់សាខា ការគ្រប់គ្រងឥណទាន ការបណ្តុះបណ្តាលបុគ្គលិក និងការធ្វើទីផ្សារទាំងក្នុងគ្រឹះស្ថានធនាគារ និងមីក្រូហិរញ្ញវត្ថុ។

លោក ខុម ច័ន្ទតារា បានបញ្ចប់ថ្នាក់បរិញ្ញាបត្រ ផ្នែកសេដ្ឋកិច្ចអភិវឌ្ឍន៍ និងអនុបណ្ឌិត ផ្នែកគ្រប់គ្រងទូទៅ ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។

នាយកដ្ឋានអភិវឌ្ឍន៍អាជីវកម្ម ជានាយកដ្ឋាននាំមកឱ្យ ក្រុមហ៊ុន នូវតម្លៃដ៏សំខាន់ៗ តាមរយៈការលើកស្ទួយការលក់ផលិតផលនានា ដើម្បីបម្រើទៅដល់ ទីផ្សារឱ្យបានល្អជាទីបំផុត។ នាយកដ្ឋាននេះស្ថិតនៅក្រោមការគ្រប់គ្រងរបស់ អ្នកស្រី ស៊ីសុវត្ថិ រស្មី ដែលបានចូលរួមជាមួយក្រុមហ៊ុន កាលពីខែមករា ឆ្នាំ២០១៨ កន្លងទៅ ក្នុងតួនាទីជានាយិកាអភិវឌ្ឍន៍អាជីវកម្ម ទទួលបន្ទុកក្នុងការពង្រីក និងបង្កើនប្រាក់ចំណូលនៃសេវាកម្មតម្លៃបន្ថែម។ អ្នកស្រី ដឹកនាំ និងអភិវឌ្ឍ ក្រុមការងារទំនាក់ទំនង ដែលជាក្រុមបម្រើការងារយ៉ាងសកម្មជាមួយអតិថិជន ក្នុងគោលបំណងធ្វើការស្វែងយល់ និងផ្តល់ប្រឹក្សាសេវាកម្មតាមសេចក្តីត្រូវការរបស់អតិថិជន។

មុនចូលបម្រើការងារនៅ ស៊ីប៊ីស៊ី អ្នកស្រី ស៊ីសុវត្ថិ រស្មី ធ្លាប់បានបម្រើការងារជាមួយធនាគារ ANZ Royal។ អ្នកស្រី បានបម្រើ ការងារក្នុងវិស័យធនាគារ និងហិរញ្ញវត្ថុ ជាង ១២ឆ្នាំ ក្នុងតួនាទី និងនាយកដ្ឋានផ្សេងៗ រួមមាន នាយកដ្ឋានសេវាកម្ម ហិរញវត្ថុពាណិជ្ជកម្ម ក្នុងការិយាល័យកណ្តាល ជាប្រធានផ្នែកទំនាក់ទំនងអតិថិជនសម្រាប់ឥណទាន និងសាជីកម្ម នៅនាយកដ្ឋានសេវាកម្មធនាគារពាណិជ្ជកម្ម បន្ទាប់មកទៀតបានចូលបម្រើក្នុងនាយកដ្ឋានសេវាកម្មធនាគារសម្រាប់បុគ្គល ទទួលខុសត្រូវសម្របសម្រួលឥណទានជាមួយការិយាល័យវិភាគហានិភ័យឥណទាន និងជាប្រធានផ្នែកអភិវឌ្ឍន៍អាជីវកម្ម និងផលិតផល បន្ទាប់មកទៀតអ្នកស្រី បានចូលបម្រើក្នុងនាយកដ្ឋានការិយាល័យនាយកប្រតិបត្តិ ក្នុងតួនាទីជាប្រធានផ្នែកប្រតិបត្តិអាជីវកម្ម។ អ្នកស្រី បានចាប់ផ្តើមការងារដំបូងជាមួយក្រុមហ៊ុន Nestle (Cambodia) Co. Ltd. នៅក្នុងនាយកដ្ឋានហិរញ្ញវត្ថុ និងគ្រប់គ្រង។

អ្នកស្រី ស៊ីសុវត្ថិ រស្មី ទទួលបានសញ្ញាបត្របរិញ្ញាបត្រ ផ្នែកហិរញ្ញវត្ថុ និងគណនេយ្យ ពីវិទ្យាស្ថានជាតិគ្រប់គ្រងកម្ពុជា សញ្ញាបត្របរិញ្ញាបត្រភាសាអង់គ្លេស ពីសាកលវិទ្យាល័យ ន័រតុន ក្រោយមកអ្នកស្រីក៏ បានបន្តការសិក្សាថ្នាក់អនុបណ្ឌិតគ្រប់គ្រងពាណិជ្ជកម្មនៅសាកលវិទ្យាល័យ Charles Sturt University។

នាយកដ្ឋានផ្នែកស្រាវជ្រាវ និងអភិវឌ្ឍន៍ គឺមានទំនួលខុសត្រូវទៅលើការជម្រុញវឌ្ឍនភាពនៃផលិតផលរបស់ ក្រុមហ៊ុនទៅតាមផែនការ​​ការគ្រប់គ្រង គោលនយោបាយ ការផ្តួចផ្តើមស្រាវជ្រាវនៅក្នុងវិស័យ​ ព្រមទាំងការដឹកនាំផ្នែកទីផ្សារ និងទំនាក់ទំនង។​ លោក PRASHANTA Pradhan ដែលជាប្រធាននាយកដ្ឋានផ្នែកស្រាវជ្រាវ និងអភិវឌ្ឍន៍​ បានចូលបម្រើការងារនៅ ស៊ីប៊ីស៊ី កាលពីខែមករា ឆ្នាំ២០២០។​

មុននឹងចូលបម្រើការងារក្នុងក្រុមហ៊ុន លោក ធ្លាប់ជាទីប្រឹក្សាអភិវឌ្ឍន៍វិស័យឯកជននៅ UNDP ប្រចាំកម្ពុជា ដែលលោក បានផ្តល់ជាគំនិតដល់ដៃគូសហការរបស់រាជរដ្ឋាភិបាល លើការអភិវឌ្ឍប្រព័ន្ធវិភាគទិន្នន័យ និងសមត្ថភាពក្នុងការគ្រប់គ្រងក្នុងវិស័យឯកជនប្រកបដោយប្រសិទ្ធិភាព។ លោក PRASHANTA Pradhan បានមករស់នៅប្រទេសកម្ពុជា ក្នុងឆ្នាំ ២០១៦ ជាទីប្រឹក្សាគោលនយោបាយពាណិជ្ជកម្មអោយ GIZ (សហគ្រាសសម្ព័ន្ធអាល្លឺម៉ង់ សំរាប់ការអភិវឌ្ឍអន្តរជាតិ) ដែល​​លោកបានជួយគាំទ្ររាជរដ្ឋាភិបាល និងអាជីវកម្មនៅប្រទេស កម្ពុជា ឡាវ មីយ៉ាន់ម៉ា និងវៀតណាម ក្នុងការធ្វើសមាហរណកម្មទីផ្សារអាស៊ានតែមួយ។ លោក ក៏ធ្លាប់ធ្វើការជាទីប្រឹក្សាក្នុងក្រុមការងារផ្នែកវិស័យសាធារណៈប្រចាំ អាស៊ីប៉ាស៊ីហ្វិក នៅក្រុមហ៊ុនប្រឹក្សាយោបល់ផ្នែកយុទ្ធសាស្រ្ត Frost & Sullivan ក្នុងប្រទេសម៉ាឡេស៊ី។

លោក PRASHANTA Pradhan ទទួលសញ្ញាបត្រអនុបណ្ឌិត ផ្នែកគោលនយោបាយសាធារណៈ ពីសាលាគោលនយោបាយសាធារណៈ Lee Kuan Yew នៃសាកលវិទ្យាល័យជាតិសង្ហិបុរី។ លោក ក៏បានទទួលសញ្ញាបត្រអនុបណ្ឌិតគ្រប់គ្រងពាណិជ្ជកម្មពីប្រទេសឥណ្ឌា និងសញ្ញាបត្របរិញ្ញាបត្រ ផ្នែកប្រព័ន្ធព័ត៌មានវិទ្យា ពីប្រទេសនេប៉ាល់ផងដែរ។

នាយកដ្ឋានវិភាគទិន្នន័យ គឺជានាយកដ្ឋានសំខាន់មួយ ដែលទទួលបន្ទុកគុណភាពទិន្នន័យ វិភាគ និងបកស្រាយទិន្នន័យ ដើម្បីទាញការយល់ដឹង ដែល​នឹងគាំទ្រសមាជិកក្នុងការអភិវឌ្ឍយុទ្ធសាស្រ្តអាជីវកម្ម និងការស្វែងរកសកម្មភាពសមស្រប។ នាយក ដ្ឋាននេះដឹកនាំដោយ អ្នកស្រី ប៉ុន បញ្ញាវត្តី ដែលលោកស្រីមានបទពិសោធន៍ជាង ១៤ឆ្នាំ ក្នុងតួនាទីគ្រប់គ្រងទិន្នន័យជាច្រើន ដែលរួមមានការទាញ សំអាត វិភាគទិន្នន័យ ការផ្ទៀងផ្ទាត់ទិន្នន័យ ការត្រួតពិនិត្យគុណភាព និងការរៀបចំរបាយការណ៍។

អ្នកស្រី ប៉ុន បញ្ញាវត្តី ចាប់ផ្តើមធ្វើការជាមួយក្រុមហ៊ុន ក្នុងតួនាទីជាអ្នកវិភាគទិន្នន័យ កាលពីខែធ្នូ ឆ្នាំ២០១៣។ ក្នុងអំឡុងពេលប៉ុន្មានឆ្នាំជាមួយក្រុមហ៊ុន អ្នកស្រីបានចូលរួមក្នុងការរៀបចំរបាយការណ៍វិភាគទិន្នន័យជាច្រើនសន្ធឹកសន្ធាប់ ដូចជារបាយការណ៍វិភាគ អនឡាញ ពិន្ទុឥណទាន ការអភិវឌ្ឍសេវាត្រួតពិនិត្យឥណទាន ដែលរបាយការណ៍ទាំងនេះអនុញ្ញាត ឱ្យសមាជិកពិនិត្យឡើងវិញនូវសំពៀតឥណទានរបស់អតិថិជនខ្លួនហើយក៏ផ្ដល់នូវរបាយការណ៍ ដែលមានបច្ចុប្បន្នភាព។ មុនពេលធ្វើការនៅក្រុមហ៊ុន អ្នកស្រីបានធ្វើការឱ្យអង្គការ ដែលជាអង្គការក្រៅរដ្ឋាភិបាលអន្ដរជាតិជាច្រើន ក្នុងតួនាទីជាអ្នកសម្របសម្រួល និងទទួលខុសត្រូវសម្រាប់ការ គ្រប់គ្រងមូលដ្ឋាន ទិន្នន័យតាមរយៈការបញ្ចូលទិន្នន័យ ផ្ទៀងផ្ទាត់ ពិនិត្យគុណភាព និងរាយការណ៍។

អ្នកស្រី ប៉ុន បញ្ញាវត្តី បានបញ្ចប់ការសិក្សាថ្នាក់អនុបណ្ឌិត ផ្នែកវិទ្យាសាស្រ្តកុំព្យូទ័រ និងវិស្វកម្ម ពីសាកលវិទ្យាល័យភូមិន្ទភ្នំពេញ។

នាយកដ្ឋានសេវាអតិថិជនមាន ៣ ផ្នែកសំខាន់ ដូចជា ផ្នែកធនធានមនុស្ស ផ្នែករដ្ឋបាលនិងលទ្ធកម្ម និងផ្នែកសេវាអតិថិជន ដែលមានគោលបំណងបម្រើសេវាអតិថិជនទាំងក្នុង និងក្រៅ ទាក់ទងនឹងការឆែករបាយការណ៍ឥណទាន តាមរយៈទូរស័ព្ទដៃ ស្ថាប័នដៃគូសហការណ៍ និងនៅការិយាល័យ ស៊ីប៊ីស៊ី។

នាយកដ្ឋាននេះ ដឹកនាំដោយ លោក ផៃ សុផល មានបទពិសោធន៍ជាង ១២ ឆ្នាំ ទៅលើវិស័យផ្សេងៗជាច្រើនដូចជា ផ្នែកស្រាវជ្រាវ និងអភិវឌ្ឍន៍ អភិវឌ្ឍផលិតផល ទីផ្សារ និងធនធានមនុស្ស នៅក្នុងវិស័យធនាគារ និងហិរញ្ញវត្ថុ បច្ចេកវិទ្យាហិរញ្ញវត្ថុ និងអង្គការក្រៅរដ្ឋាភិបាល។

លោកបានចូលរួមជាមួយ ស៊ីប៊ីស៊ី ក្នុងតួនាទីជាប្រធានផ្នែកអភិវឌ្ឍផលិតផល ក្នុងឆ្នាំ ២០១៦ ហើយបន្ទាប់មកលោកបានផ្លាស់ប្តូរជាប្រធានផ្នែកទីផ្សារ។ ហើយបន្ទាប់មក លោកត្រូវបានតែងតាំងជានាយកសេវាអតិថិជន។ មុនពេលចូលធ្វើការនៅ ស៊ីប៊ីស៊ី លោក ផៃ សុផល ធ្លាប់ធ្វើការទៅលើវិស័យផ្សេងៗជាច្រើនដូចជា ផ្នែកស្រាវជ្រាវ និងអភិវឌ្ឍន៍ ផ្នែកអភិវឌ្ឍន៍ផលិតផល ផ្នែកទីផ្សារផលិតផល ផ្នែកទីផ្សារ និងផ្នែកធនធានមនុស្ស។ លោកបានចាប់ផ្តើមការងារដំបូងជាបុគ្គលិកនៅក្នុង អង្គការ ភី អេស អាយ មានតួនាទីជាភ្នាក់ងារអប់រំ មុននឹងចូលធ្វើការនៅក្នុង គ្រឹះស្ថានមីក្រូហិរញ្ញវត្ថុធំមួយ។ បន្ទាប់មក លោក បានទៅបម្រើការងារនៅធនាគារឯកទេស វីង ជាបុគ្គលិកផ្នែកស្រាវជ្រាវ និងអភិវឌ្ឍផលិតផល ហើយក្រោយមក ត្រូវបានតម្លើងតំណែងជាមន្ត្រីជាន់ខ្ពស់ផ្នែកផលិតផលទីផ្សារ។

លោក បានបញ្ចប់បរិញ្ញាបត្រជាន់ខ្ពស់ ផ្នែកសហគ្រិនភាព និងគ្រប់គ្រងគម្រោង ដែលជាកម្មវិធីសហការរវាង សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ជាមួយនឹងសាកលវិទ្យាល័យ Lumière Lyon 2 នៅប្រទេសបារាំង។ លោក ក៏បានបញ្ចប់បរិញ្ញាបត្រផ្នែកគ្រប់គ្រង​​​​​​​​​​សហគ្រាសពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងបរិញ្ញាបត្រ ផ្នែកភាសាអង់គ្លេស ពីសាកលវិទ្យាល័យភូមិន្ទភ្នំពេញ (IFL) ផងដែរ។

មុខងារអនុលោមតាម ចងក្រងនូវរាល់តម្រូវការផ្លូវច្បាប់ ខណៈពេលដែលមុខងារហានិភ័យ ប្រមើលអំពីហានិភ័យផ្សេងៗ ដែលអាចកើតមានឡើងដោយផ្ទាល់ ឬដោយប្រយោល តាមរយៈការសហការជាមួយ នាយកដ្ឋានទាំងអស់ ដើម្បីធានាអោយបានថាក្រុមហ៊ុនបាន អនុលោមគ្រប់ជ្រុងជ្រោយ និងទប់ស្កាត់រាល់ហានិភ័យទាំងនោះ មិនអោយកើតឡើង នៅកម្រិតមួយតិចតួចបំផុត។

លោក ច្រឹក សុធា បានចូលបម្រើការងារនៅក្នុងក្រុមហ៊ុន ស៊ីប៊ីស៊ី តាំងពីការចុះបញ្ជីក្រុមហ៊ុន ដោយមានតួនាទី ជាមន្ត្រីអភិវឌ្ឍន៍អាជីវកម្ម ទទួលខុសត្រូវ ក្នុងការទាក់ទង និងពន្យល់គ្រឹះស្ថានធនាគារ និងហិរញ្ញវត្ថុនាពេលនោះក្នុងការចូលជា សមាជិករបស់ក្រុមហ៊ុន។ ក្រោយមក គាត់បានប្ដូរមកកាន់នាយកដ្ឋានប្រតិបត្តិការ ដោយទទួលខុសត្រូវ ក្នុងការសម្របសម្រួលដំណើរការ និងលំហូរប្រតិបត្តិការជាមួយសមាជិក។ ក្នុងនាមជាមន្រ្តីជាន់ខ្ពស់ដែលមានបទពិសោធន៍ច្រើនជាង ១២ឆ្នាំ នៅក្នុងវិស័យធនាគារ និងការគ្រប់គ្រងទិន្នន័យ លោក ច្រឹក សុធា ត្រូវបានតែងតាំងជា នាយកនៃនាយកដ្ឋានគ្រប់គ្រងហានិភ័យ និងអនុលោមតាម ដើម្បីធានាអោយបានថាមុខងារទាំងពីរនោះប្រព្រឹត្តទៅយ៉ាងរលូន។

មុនពេលចូលរួមជាមួយក្រុមហ៊ុន ស៊ីប៊ីស៊ី លោក ច្រឹក សុធា បានបម្រើការងារនៅសមាគមធនាគារនៅកម្ពុជាអស់រយៈពេល ៦ឆ្នាំ។ សកម្មភាព និងការចូលរួមរបស់លោកក្នុងសមាគមធនាគារនៅកម្ពុជា បាននាំមកនូវទំនាក់ទំនង និងកិច្ចសហប្រតិបត្តិការល្អរវាងសមាជិកទាំងអស់។ ក្នុងអំឡុងពេលបម្រើការងារ របស់លោកនៅក្នុងសមាគមនេះ លោក ច្រឹក សុធា ក៏បានបម្រើការងារនៅក្នុងគណៈកម្មាធិការ ៥ ផ្សេងគ្នា ដែលរួមមានគណៈកម្មធិការទូទាត់ គណៈកម្មធិការ SWIFT គណៈកម្មធិការ ក្រុមការងារវិស័យឯកជន គណៈកម្មធិការរៀបចំកម្មវិធី និងជាពិសេស គណៈកម្មធិការសម្រាប់បង្កើតក្រុមហ៊ុនក្រេឌីតប្យួរ៉ូ។

លោក ច្រឹក សុធា បានបញ្ចប់ការសិក្សាថ្នាក់បរិញ្ញាបត្រ ផ្នែកសេដ្ឋកិច្ច និងហិរញ្ញវត្ថុ ពីសាកលវិទ្យាល័យន័រតុន និងសញ្ញាបត្រអនុបណ្ឌិត ផ្នែកគ្រប់គ្រងទូទៅ ពីសាកលវិទ្យាល័យ បៀលប្រាយ។

នាយកដ្ឋានសវនកម្មផ្ទៃក្នុង គឺជានាយកដ្ឋានមួយ ដែលមិនអាចរំលងបាន ដែលមានតួនាទីយ៉ាងសំខាន់មួយក្នុងការបំពេញនូវភាពខ្វះខាត ឬចន្លោះប្រហោងណាមួយដែលអាចកើតឡើង ជាយថា ហេតុ។ កញ្ញ លាង សូលីដា ដែលបានចូលរួមជាមួយក្រុមហ៊ុនកាលពីខែតុលា ឆ្នាំ២០១៧ ក្នុងតំណែងជា ប្រធានសវនកម្មផ្ទែក្នុង ជាអ្នកដឹកនាំនាយកដ្ឋានដ៏សំខាន់មួយនេះ។ បន្ទាប់មក កញ្ញា ត្រូវបានតំឡើងតួនាទីជា នាយិកាសវនកម្មផ្ទៃក្នុង។ មុននឹងចាប់ផ្ដើមជាមួយ ​​ក្រុមហ៊ុន កញ្ញា បានបម្រើការងារ ជាប្រធានសវនកម្ម នៅក្រុមហ៊ុន ខូវេណិនថ៍​ អិលធីឌី ដែលជាក្រុមហ៊ុនគណនេយ្យ ក្នុងតំបន់ទទួលអាជ្ញាប័ណ្ណជាមួយវិទ្យាស្ថានគណនេយ្យករជំនាញ និងសវនករកម្ពុជា (KICPAA) នៅរាជាធានីភ្នំពេញហើយ កញ្ញា ក៏ធ្លាប់បានបម្រើការនៅក្នុង​ក្រុមហ៊ុនសវនកម្ម អឺនស្ទ៍ អ៊ែន យ៉ាំង (ខេមបូឌា) និងនៅធនាគារកាណាឌីយ៉ា ក.អ.។

កញ្ញ លាង សូលីដា ទទួលបានវិញ្ញាបនបត្រជាន់ខ្ពស់ ជំនាញគណនេយ្យ និងពាណិជ្ជកម្ម ពី The Association of Chartered Certified Accountants ដែលមានមូលដ្ឋាននៅ ទីក្រុងឡុងដ៍ ប្រទេសអង់គ្លេស។ កញ្ញា ក៏បានទទួលបរិញ្ញាបត្រ ផ្នែកគណនេយ្យ ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្រ្តសេដ្ឋកិច្ច វិញ្ញាបនបត្រ ផ្នែកច្បាប់ពាណិជ្ជកម្មកម្ពុជា ពន្ធដារកម្ពុជា និងស្តង់ដារ របាយការណ៍ទាក់ទងនឹងហិរញ្ញវត្ថុអន្តរជាតិ​ សម្រាប់អង្គភាពធុនតូច និងមធ្យម ពី CamEd Business School រួមជាមួយនឹងការបញ្ចប់វគ្គហ្វឹកហ្វឺនអំពីសវនកម្មផ្ទៃក្នុង ពីសាជីវកម្មហិរញ្ញវត្ថុអន្តរជាតិ (IFC) ផងដែរ។

នាយកដ្ឋានហិរញ្ញវត្ថុ គឺជានាយកដ្ឋានសំខាន់មួយក្នុងចំណោមនាយកដ្ឋានផ្សេង ទៀតក្នុងការផ្តល់ព័ត៌មាន ហិរញ្ញវត្ថុទៅអ្នកប្រើប្រាស់ទាំងខាងក្នុង និងខាងក្រៅ ដើម្បីយកវាទៅប្រើប្រាស់តាម មុខងារអាជីវកម្មឱ្យមានប្រសិទ្ធភាព គាំទ្រលើការធ្វើ ផែនការ អាជីវកម្ម និងការសំរេចចិត្តផ្សេងៗនៅក្នុងក្រុមហ៊ុន។

អ្នកស្រី គា សៅវ៉ារិន គឺជាអ្នកជំនាញផ្នែកហិរញ្ញវត្ថុ ដែលទទួលបានសញ្ញាបត្រជាច្រើន និងបទពិសោធន៍យ៉ាងទូលំទូលាយ ប្រមាណ ៩ឆ្នាំ លើវិស័យមីក្រូហិរញ្ញវត្ថុ និងពាណិជ្ជកម្ម នៅក្នុងប្រទេសកម្ពុជា។ អ្នកស្រី គឺជាអ្នកគ្រប់គ្រងក្នុងការកំណត់ទិសដៅ និងដំណើរការនៅក្នុងនាយកដ្ឋានហិរញ្ញវត្ថុ នៅក្នុងក្រុមហ៊ុន។ អ្នកស្រី ទទួលបានសញ្ញាបត្របរិញ្ញាប័ត្រ ផ្នែកគណនេយ្យ ពីវិទ្យាស្ថានវ៉ាន់ដា និងសញ្ញាបត្របញ្ជាក់ជាភ្នាក់ងារសេវាកម្មពន្ធដារ
ពីអគ្គនាយកដ្ឋានពន្ធដារ (GDT) ។

លើសពីនេះទៅទៀត អ្នកស្រី គា សៅវ៉ារិន ធ្លាប់បានចូលរួមវគ្គបណ្តុះបណ្តាលអំពីស្តង់ដារបាយការណ៍ ហិរញ្ញវត្ថុកម្ពុជាសម្រាប់ក្រុមហ៊ុនខ្នាតតូច និងមធ្យមជាមួយនឹងសាលា CamEd និងវគ្គបណ្តុះបណ្តាលជាច្រើនទៀត ទាក់ទងទៅនឹងការគ្រប់គ្រងផ្នែកគណនេយ្យ និងការគ្រប់គ្រងហិរញ្ញវត្ថុ ។