សិក្ខាសាលាស្ដីអំពី “ការគ្រប់គ្រងហានិភ័យឥណទានតាមរយៈប្រព័ន្ធចែករំលែកព័ត៌មានឥណទាន”
កាលបរិច្ឆេទផ្សាយ: ថ្ងៃព្រហស្បតិ៍ កញ្ញា 5th, 2019
រាជធានីភ្នំពេញៈ នាថ្ងៃទី ០៥ ខែ កញ្ញា ឆ្នាំ២០១៩ កន្លងទៅ ការិយាល័យឥណទានកម្ពុជា(ស៊ីប៊ីស៊ី) បានចូលរួមសហការជាមួយវិទ្យាស្ថាន វ៉ាន់ដា រៀបចំកម្មវិធីសិក្ខាសាលា លើប្រធានបទស្ដីអំពី “ការគ្រប់គ្រងហានិភ័យឥណទានតាមរយៈប្រព័ន្ធចែករំលែកព័ត៌មានឥណទាន”។ សិក្ខាសាលានេះមានការអញ្ជើញចូលរួមក្រោមអធិបតីភាពរបស់លោក អឿ សុធារ័ត្ន ប្រធាននាយកប្រតិបត្តិ នៃការិយាល័យឥណទានកម្ពុជា និង កញ្ញា ហ៊ូ គុជគន្ធលីនណា នាយិកា រង វិទ្យាស្ថាន វ៉ាន់ដា។ សិក្ខាសាលានេះក៏មានការចូលរួមពីលោកសាស្ត្រាចារ្យនៃសាកលវិទ្យាល័យ និងនិស្សិតជាច្រើនកុះករសរុបជាង ២០០នាក់ ដែលកំពុងសិក្សានៅវិទ្យាស្ថាននេះ លើជំនាញ គណនេយ្យ និង ធនាគារ។
គោលបំណងនៃការបង្កើតអោយមានកម្មវិធីសិក្ខាសាលានេះគឺដើម្បីចែករំលែកចំណេះដឹងហិរញ្ញវត្ថុ និងអាចផ្សារភ្ជាប់ទ្រឹស្ដីដែលប្អូនៗនិសិ្សតបានសិក្សានៅសាលា ទៅនឹងការអនុវត្តន៍ជាក់ស្ដែងក្នុងទីផ្សារ និងលើកកម្ពស់ការយល់ដឹងពី ការគ្រប់គ្រងហានិភ័យឥណទានតាមរយៈប្រព័ន្ធចែករំលែកព័ត៌មានឥណទាន ប្រតិបត្តិការនៃប្រព័ន្ធចែករំលែកព័ត៌មានឥណទានក្នុងព្រះរាជាណាចក្រកម្ពុជា និងជាពិសេសផ្ដល់ជាបំណិនបន្ថែមដល់ប្អូនៗនិសិ្សតដើម្បីបង្កើនប្រសិទ្ធភាពការងារ និងរួមគ្នាអភិវឌ្ឍន៍សេដ្ឋកិច្ចកម្ពុជាក្នុងពេលអនាគត។ លើសពីនេះ សិក្ខាសាលាក៏មានគោលបំណងលើកកម្ពស់សកម្មភាពជួយសង្គម និងសកម្មភាពមនុស្សធម៌ ហើយចូលរួមជាមួយ ក្រសួងអប់រំ យុវជន និងកីឡា ដើម្បីបង្កើនគុណភាពអប់រំ តាមរូបភាពនៃការអប់រំក្រៅប្រព័ន្ធ ដែលជាផ្នែកមួយដ៏សំខាន់ក្នុងការជួយពង្រឹងសមត្ថភាពនិស្សិត ដើម្បីត្រៀមខ្លួនរួចរាល់ក្នុងការចាប់យកឱកាសការងារក្នុងពេលដ៏ខ្លីខាងមុខ។
ចំណេះដឹងផ្នែកហិរញ្ញវត្ថុកំពុងតែត្រូវបានគេទទួលស្គាល់ថាជាគោលដៅសំខាន់មួយនៅក្នុងប្រទេសកម្ពុជា។ ទាំងនេះគឺជាការឆ្លុះបញ្ចាំងពីតម្រូវការរបស់ប្រជាជនកម្ពុជាក្នុងការស្វែងយល់និងគ្រប់គ្រង់ហិរញ្ញវត្ថុរបស់ខ្លួន ដែលជារឿងចាំបាច់ក្នុងការធ្វើការសម្រេចចិត្តផ្នែកហិរញ្ញវត្ថុ សម្រេចបានសុខមាលភាពហិរញ្ញវត្ថុ និងផ្តល់អត្ថប្រយោជន៍ទៅដល់កំណើនសេដ្ឋកិច្ចសង្គមរបស់ប្រទេសផងដែរ។
កាលពីខែមេសា ឆ្នាំ២០១៩កន្លងទៅ ធនាគារជាតិនៃកម្ពុជាបានចុះហត្ថលេខាលើអនុស្សរណៈយោគយល់គ្នាជាមួយក្រសួងអប់រំយុវជននិងកីឡា តាមយុទ្ធសាស្ត្រអភិវឌ្ឍវិស័យហិរញ្ញវត្ថុឆ្នាំ២០១៦-២០២៥ ដោយបញ្ចូលចំណេះដឹងផ្នែកនេះ ទៅក្នុងកម្មវិធីសិក្សាពីថ្នាក់ទី១ ដល់ថ្នាក់ទី១២ ទៅលើផ្នែកគណិតវិទ្យា សេដ្ឋកិច្ច និងពលរដ្ឋវិជ្ជាផងដែរ ដើម្បីលើកកម្ពស់ការយល់ដឹងលើចំណេះដឹងហិរញ្ញវត្ថុនៅកម្ពុជា។
លោក អឿ សុធារ័ត្ន ប្រធាននាយកប្រតិបត្តិនៃស៊ីប៊ីស៊ីមានប្រសាសន៍ថា «ស៊ីប៊ីស៊ីជឿជាក់ថា ការចែករំលែកចំណេះដឹងហិរញ្ញវត្ថុ នឹងជួយក្នុងដំណើរកសាងជីវិតជោគជ័យ និងធ្វើអោយនិស្សិតយល់កាន់តែច្បាស់ពី ការគ្រប់គ្រងហានិភ័យឥណទានតាមរយៈប្រព័ន្ធចែករំលែកឥណទាន ព្រមទាំងចំណេះដឹងពាក់ព័ន្ធនឹងរបាយការណ៍ឥណទានដែលនឹងជួយអោយប្អូនៗនិស្សិតត្រៀមខ្លួនរួចរាល់ និងធ្វើការសម្រេចចិត្តបានត្រឹមត្រូវមុនពេលស្នើសុំឥណទាននៅពេល អនាគត។»
ស៊ីប៊ីស៊ី បានកំពុងបន្តរៀបចំធ្វើកម្មវិធិសិក្ខាសាលានៅតាមសកលវិទ្យាល័យជាច្រើន ទៅលើប្រធានបទខុសៗគ្នា សម្រាប់និស្សិតនៅតាមរាជធានីភ្នំពេញ ក៏ដូចជានៅតាមបណ្តាខេត្តផ្សេងៗដែលមានដូចជាសៀមរាប ព្រះសីហនុ និងកំពង់ចាមជាដើម។ លើសពីនេះ យើងក៏បានរៀបចំនៅកម្មវិធីសម្រាប់សាធារណៈជនទូទៅ រួមមានកម្មវិធី Consumer Talk និងកម្មវិធីផ្សេងៗទៀត ក្នុងការបង្កើនការយល់ដឹងអោយកាន់តែប្រសើរឡើងទៅលើព័ត៌មានឥណទានផ្សេងៗសម្រាប់និស្សិតនិងសាធារណជនទូទៅ។ ក្រៅពីនេះទៀត ស៊ីប៊ីស៊ីក៏បានផ្តួចផ្តើមកម្មវិធីចូលរួមចំណែកជួយសង្គម តាមរយៈការឧបត្ថម្ភដល់អង្គការក្រៅរដ្ឋាភិបាលជាច្រើនដែលធ្វើការយ៉ាងជិតស្និទ្ធជាមួយប្រជាជននៅក្នុងសហគមន៍ ក្នុងគោលបំណងលើកកម្ពស់ចំណេះដឹងទាំងនេះ។
ការិយាល័យឥណទានកម្ពុជាចាប់ផ្តើមប្រតិបត្តិការជាផ្លូវការនៅថ្ងៃទី ១៩ ខែមីនា ឆ្នាំ២០១២ ដោយមានការគាំទ្រពីធនាគាជាតិនៃកម្ពុជា សមាគមមីក្រូហិរញ្ញវត្ថុកម្ពុជា សមាគមធនាគារនៅកម្ពុជា និងសាជីវកម្មហិរញ្ញវត្ថុអន្តរជាតិ។ ស៊ីប៊ីស៊ី លើកកម្ពស់ស្ថេរភា ពហិរញ្ញវត្ថុអោយកាន់តែប្រសើរឡើង ដោយផ្តល់នូវទិន្នន័យទាន់ពេលវេលានិងជាក់លាក់ទៅកាន់គ្រឹះស្ថានហិរញ្ញវត្ថុនិង ស្ថាប័នហិរញ្ញវត្ថុដែលជាសមាជិក ក្នុងការជួយដល់ការគ្រប់គ្រងទិដ្ឋភាពហិរញ្ញវត្ថុនៃអាជីវកម្មរបស់ពួកគេ ដោយអនុញ្ញាតអោយអាជីវកម្មទាំងមូលអាច គ្រប់គ្រងហានិភ័យឥណទាន ការពារការក្លែងបន្លំអត្តសញ្ញាណ និងធ្វើការសម្រេចចិត្តបានលឿន។ ស៊ីប៊ីស៊ី ក៏បានផ្តល់ភាពងាយស្រួលដល់ប្រជាពលរដ្ឋគ្រប់រូបក្នុងការត្រួតពិនិត្យមើលរបាយការណ៍ឥណទានរបស់ខ្លួន ដើម្បីធានាថា ពួកគេមានឱកាសក្នុងការស្វែងរកនិងទទួលបានប្រាក់កម្ចីនិងការពារខ្លួនពីការលួចបន្លំអត្តសញ្ញាណផងដែរ។ គិតត្រឹមខែសីហា ឆ្នាំ២០១៩ ស៊ីប៊ីស៊ីមានសមាជិកចំនួនលើសពី១៦៥ ស្ថាប័នដែលរួមមានធនាគារ គ្រឹស្ថានមីក្រូហិរញ្ញវត្ថុ ក្រុមហ៊ុនភតិសន្យា និងគ្រឹះស្ថានឥណទានជនបទ។
