សិក្ខាសាលាស្ដីអំពី “ការគ្រប់គ្រងហានិភ័យឥណទានតាមរយៈប្រព័ន្ធចែករំលែកព័ត៌មានឥណទាន”
កាលបរិច្ឆេទផ្សាយ: ថ្ងៃពុធ សីហា 2nd, 2017
នាថ្ងៃទី ២០ ខែ កក្កដា ឆ្នាំ២០១៧ កន្លងទៅ នៅសាកលវិទ្យាល័យអាស៊ីអឺរ៉ុប មានការប្ររព្ធបានប្រារព្ធកម្មវិធីសិក្ខាសាលា ដែលរៀបចំឡើងដោយ ការិយាល័យឥណទានកម្ពុជា រួមសហការដោយ ធនាគាជាតិនៃកម្ពុជា សាជីវកម្មហិរញ្ញវត្ថុអន្តរជាតិ និងសាកលវិទ្យាល័យអាស៊ីអឺរ៉ុប ស្ដីអំពី “ការគ្រប់គ្រងហានិភ័យឥណទានតាមរយៈប្រព័ន្ធចែករំលែកព័ត៌មានឥណទាន”។ សិក្ខាសាលានេះមានការអញ្ជើញចូលរួមក្រោមអធិបតីភាពរបស់លោក អឿ សុធារ័ត្ន ប្រធាននាយកប្រតិបត្តិស្ដីទីនៃការិយាល័យឥណទានកម្ពុជា លោក ង៉ែត សុវណ្ណារិទ្ធ អគ្គនាយករងត្រួតពិនិត្យធនាគារជាតិ នៃកម្ពុជា និង លោក ជា សុភាព សាកលវិទ្យាធិការ នៃសាកលវិទ្យាល័យអាស៊ីអឺរ៉ុប។ សិក្ខាសាលានេះក៏មានការចូលរួមរបស់និស្សិតជាច្រើនកុះករសរុបជាង ៣០០នាក់ ដែលកំពុងសិក្សានៅសាកលវិទ្យាល័យអាស៊ីអឺរ៉ុបជំនាញគណនេយ្យ ទីផ្សារ ធនាគារ និង សេដ្ឋកិច្ច។
គោលបំណងនៃការបង្កើតអោយមានកម្មវិធីសិក្ខាសាលានេះគឺដើម្បីចែករំលែកចំណេះដឹង និងអាចផ្សារភ្ជាប់ទ្រីស្ដីប្អូនៗនិសិ្សតដែលកំពុងសិក្សានៅសាលា ទៅនឹងការអនុវត្តន៍ជាក់ស្ដែងក្នុងទីផ្សារ និងលើកកម្ពស់ការយល់ដឹងពីការិយាល័យឥណទានកម្ពុជា និងជាពិសេសផ្ដល់ជាបំណិនបន្ថែមដល់ប្អូនៗនិសិ្សតដើម្បីបង្កើនប្រសិទ្ធភាពការងារ និងរូមគ្នាអភិវឌ្ឍន៍សេដ្ឋកិច្ចកម្ពុជាក្នុងពេលអនាគត។
គួរបញ្ជាក់ថា ការិយាល័យឥណទានកម្ពុជា តែងតែបានចូលរួមជាប្រចាំក្នុងសកម្មភាព មនុស្សធម៌ កីឡា និងសិក្ខាសាលាចែករំលែកចំណេះដឹងផ្សេងៗ ក្នុងគោលបំណងគោលបំណងលើកកម្ពស់សកម្មភាពជួយសង្គម និងសកម្មភាពមនុស្សធម៌ និងចូលរួមជាមួយក្រសួងអប់រំ យុវជន និងកីឡា ដើម្បីបង្កើនគុណភាពអប់រំ តាមរូបភាពនៃការអប់រំក្រៅប្រព័ន្ធ ដែលជាផ្នែកមួយដ៏សំខាន់ក្នុងការជួយពង្រឹងសមត្ថភាពនិស្សិត ដើម្បីត្រៀមខ្លួនរួចរាល់ក្នុងការចាប់យកឱកាសការងារក្នុងពេលដ៏ខ្លីខាងមុខ។
