ការិយាល័យឥណទានកម្ពុជាប្រារព្ធខួបប្រាំឆ្នាំនៃការផ្តល់ព័ត៌មានឥណទានប្រកបដោយតម្លាភាពនៅកម្ពុជា
កាលបរិច្ឆេទផ្សាយ: ថ្ងៃអង្គារ តុលា 31st, 2017
នៅថ្ងៃទី ១៩ ខែមីនា ឆ្នាំ២០១២ បន្ទាប់ពីទទួលបានការអនុញ្ញាតពីធនាគារជាតិនៃកម្ពុជាលើការស្នើសុំបង្កើតការិយាល័យឥណទាននៅក្នុងព្រះរាជាណាចក្រកម្ពុជា ក្រុមហ៊ុនស៊ីប៊ីស៊ីក៏បានបើកដំណើការការិយាល័យប្រតិបត្តិការរបស់ខ្លួននាពេលនោះផងដែរ។ ចាប់តាំងពីបង្កើតមកដល់បច្ចុប្បន្ន ការិយាល័យឥណទានកម្ពុជា បានប្រមូលទិន្នន័យពីស្ថាប័នហិរញ្ញវត្ថុទាំងអស់ដើម្បីផ្តល់ព័ត៌មានអំពីឥណទានដែលពេញលេញ អាចជឿ ទុកចិត្តបាន នៅប្រទេសកម្ពុជា។ ទិន្នន័យត្រូវបានប្រើប្រាស់សម្រាប់របាយការណ៍ឥណទានបុគ្គល របាយការណ៍ព័ត៌មានឥណទានសាធារណៈ និងសេវាព័ត៌មានហិរញ្ញវត្ថុផ្សេងៗទៀត សម្រាប់គ្រឹះស្ថានហិរញ្ញវត្ថុនានា។
ការរួមចំណែកដល់កំណើនសេដ្ឋកិច្ចក្នុងព្រះរាជាណាចក្រកម្ពុជា
ក្រុមហ៊ុនស៊ីបីស៊ី គឺជាស្ថាប័នដំបូងគេបង្អស់ដែលបាន និងកំពុងផ្តល់ព័ត៌មានពោពេញដោយភាពជឿទុកចិត្តបាននៅលើទីផ្សារឥណទានកម្ពុជា។ ដូច្នេះហើយវាបានបង្កនូវភាពងាយស្រួលដល់វិនិយោគិនក្នុងការចូលមកកាន់ទីផ្សារកម្ពុជាដោយអាចធ្វើការប្រឹក្សានូវរបាយការណ៍ព័ត៌មានឥណទានសាធារណៈ ឬធ្វើការស្នើសុំរបាយការណ៍ដោយផ្ទាល់តាមរយៈទិន្នន័យរបស់ក្រុមហ៊ុនស៊ីប៊ីស៊ី ។ ក្រុមហ៊ុនស៊ីប៊ីស៊ី មានមោទនភាពយ៉ាងខ្លាំងចំពោះសកម្មភាពរបស់ខ្លួន ដោយបានរកឃើញថា ខ្លួនបានជួយជម្រុញឱ្យប្រទេសកម្ពុជា ទទួលបានចំណាត់ថ្នាក់កាន់តែប្រសើរឡើងក្នុងរបាយការណ៍ប្រចាំឆ្នាំ របស់ក្រុមធនាគារពិភពលោកស្តីពីភាពងាយស្រួលក្នុងការធ្វើជំនួញ ដែលបានធ្វើឱ្យកម្ពុជាជាប់ចំណាត់ថ្នាក់ជាប្រទេសល្អបំផុតទី ៧ នៅលើពិភពលោក ចំពោះភាពងាយស្រួលក្នុងការទទួលបានឥណទាន។ ពិន្ទុសម្រាប់ប្រទេសនីមួយៗត្រូវបានគណនាតាមលក្ខណៈវិនិច្ឆ័យជាច្រើន រួមមានការបង្កើតការិយាល័យឥណទាន និងការអនុលោមទៅតាមបទដ្ឋានអន្ដរជាតិ។
លោកអឿ សុធារ័ត្ន ប្រធាននាយកប្រតិបត្តិរបស់ក្រុមហ៊ុនស៊ីប៊ីស៊ី បានមានប្រសាសន៍ថា៖ “ការិយាល័យឥណទានភាគច្រើនមាននៅបណ្តាប្រទេសអភិវឌ្ឍន៍ដូចជា៖ សឹង្ហបុរី ជប៉ុន អាមេរិក និងអឺរ៉ុប … ហើយដោយឡែកការិយាល័យឥណទានរបស់យើងទទួលបានការកោតសរសើរ និងទទួលស្គាល់ថាជាគំរូដ៏ជោគជ័យ”។ លោកបានបន្ថែមទៀតថា៖ យើងមានមោទនភាពចំពោះការចូលរួមចំណែកក្នុងការអភិវឌ្ឍសេដ្ឋកិច្ចកម្ពុជា។
គ្រឹះស្ថានអព្យាក្រឹត្យ និងឯករាជ្យក្នុងការការពារស្ថាប័នហិរញ្ញវត្ថុនិងអតិថិជន
ក្រោមកិច្ចសហការជាមួយស្ថាប័នហិរញ្ញវត្ថុជាង ១៤០ នៅកម្ពុជា ក្រុមហ៊ុនស៊ីប៊ីស៊ី គឺជាស្ថាប័នធ្វើការទៅលើការប្រមូលទិន្នន័យពីបណ្តាធនាគារ គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យា និងប្រតិបត្តិករឥណទានទាំងអស់។ នៅពេលទិន្នន័យបានប្រមូលរួចរាល់ ស៊ីប៊ីស៊ីធ្វើការវិភាគ និងចងក្រងទិន្នន័យទំាងនោះទុកដើម្បីផ្ដល់ជាចក្ខុវិស័យច្បាស់លាស់ និងមានតម្លាភាព អំពីប្រវត្តិឥណទានរបស់ស្ថាប័នទាំងនោះ។
ក្រុមហ៊ុនស៊ីប៊ីស៊ីបានធ្វើរបាយការណ៍ជាង ១៣ លានរបាយការណ៍ ចាប់ពីឆ្នាំ ២០១២ មក។ ផ្អែកទៅលើព័ត៌មានដែលផ្តល់ដោយស្ថាប័នហិរញ្ញវត្ថុនីមួយៗ ជួយអោយមានទិន្ន័យជារួមមួយដើម្បីអាចយល់យ៉ាងច្បាស់ពីស្ថានភាពឥណទានជាសកលរបស់បុគ្គលម្នាក់ៗ។ សម្រាប់អតិថិជនកម្ចី វាគឺជាឱកាស ក្នុងការជួយឱ្យពួកគេមានប្រវត្តិស្ថានភាពឥណទានផ្ទាល់ខ្លួនមួយច្បាស់លាស់ និងជាពិសេសជួយបង្ការបំណុលវ័នក សម្រាប់អតិថិជនដែលគ្មានលទ្ធភាពសងត្រលប់វិញ។ សម្រាប់ស្ថាប័ន ផ្តល់កម្ចី ក្រៅពីជួយធ្វើការសម្រេចចិត្តបានលឿននៅពេលផ្តល់ប្រាក់កម្ចីហើយនោះ វាក៏ជាឧបករណ៍ដ៏មានតម្លៃក្នុងការកាត់បន្ថយហានិភ័យឥណទាន និងការពារពីការលួចបន្លំផ្សេងៗ។ រាល់របាយការណ៍ទាំងអស់ត្រូវបានការពារ និងរក្សាទុកជាការសម្ងាត់ ហើយរបាយការណ៍ទំាងនេះអាចទាញយកបានតាមរយៈស្ថាប័ននីមួយៗបន្ទាប់ពីមានការព្រមព្រៀងពីអតិថិជន ។ ប្រជាជនកម្ពុជាទាំងអស់ក៏មានសិទ្ធិទទួលបានរបាយការណ៍ហិរញ្ញវត្ថុផ្ទាល់ខ្លួនរបស់ពួកគេក្នុងមួយឆ្នាំម្តងដោយឥតគិតថ្លៃផងដែរ។
ការខិតខំប្រឹងប្រែងដើម្បីទទួលបានទិន្នន័យកាន់តែសុក្រិត
ក្រុមហ៊ុនស៊ីប៊ីស៊ី តែងតែធ្វើការលើកកម្ពស់គុណភាពទិន្នន័យដែលប្រមូលបាន តាមរយៈការគ្រប់គ្រងទិន្នន័យយ៉ាងហ្មត់ចត់ និងមានភាពរឹងមាំលើដំណើរការទិន្នន័យ។ ទិន្នន័យដែលមានសុវត្ថិភាព ការការពារ ភាពជឿជាក់ និងទុកចិត្តបាន ជាកត្តាសំខាន់ និងជាផ្នែកមួយនៃការត្រួតពិនិត្យប្រចាំថ្ងៃរបស់ស៊ីប៊ីស៊ី។ នៅក្នុងផ្នែកសេវាកម្ម ស៊ីប៊ីស៊ី ផ្តល់ការបណ្តុះបណ្តាលដល់សមាជិកគ្រឹះស្ថានហិរញ្ញវត្ថុនៅពេលពួកគេចូលជាសមាជិករបស់ការិយាល័យឥណទានលើកដំបូង និងវគ្គបណ្តុះបណ្តាលផ្សេងទៀតក្នុងមួយឆ្នាំៗឬវគ្គបណ្តុះបណ្តាលតាមតម្រូវការជាច្រើនទៀត ។
ក្រុមហ៊ុនស៊ីប៊ីស៊ី តែងតែស្តាប់ និងមានទំនាក់ទំនងយ៉ាងជិតស្និតជាមួយសមាជិកគ្រឹះស្ថានហិរញ្ញវត្ថុនានាដើម្បីធ្វើការសិក្សាថាតើការកែប្រែបែបណាដែលសមាជិករបស់យើងត្រូវការ ហេតុដូច្នេះហើយបានជាយើងតម្រូវឱ្យធ្វើការកែលម្អយ៉ាងហោចណាស់ ៣ ដងក្នុងមួយឆ្នាំទៅលើប្រព័ន្ធរបាយការណ៍ឥណទានរបស់យើង។ ក្រុមហ៊ុនស៊ីប៊ីស៊ី តែងតែរក្សាប្រព័ន្ធប្រតិបត្តិការរបស់ខ្លួនអោយមានទំនាក់ទំនងទៅនឹងការវិវត្តន៍នៃតម្រូវការ និងទីផ្សារជានិច្ច។
លោកសុធារ័ត្ន បានមានប្រសាសន៍ថា៖ នេះជាលើកទីមួយហើយដែលយើងប្រារព្ធខួបប្រាំឆ្នាំនេះឡើង ប៉ុន្តែយើងជឿជាក់ថានឹងមានកម្មវិធីផ្សេងៗទៀតជាច្រើននាពេលខាងមុខ។ លោកបន្តថា៖ នៅមានរឿងជាច្រើនទៀតដែលយើងត្រូវធ្វើក្នុងប្រទេសកម្ពុជា ហើយយើងមានសេចក្តីសោមន្សរីករាយក្នុងការបន្តអភិវឌ្ឍសកម្មភាពរបស់យើងនាពេលប៉ុន្មានឆ្នាំខាងមុខនេះ។
