រាជធានីភ្នំពេញ ប្រទេសកម្ពុជា ថ្ងៃពុធទី 31 ខែសីហា ឆ្នាំ 2016 ៖ ក្រេឌីតប្យូរ៉ូកម្ពុជា (ស៊ីប៊ីស៊ី) ដែលជាក្រុមហ៊ុនឈានមុខគេ ក្នុងការផ្ដល់ព័ត៌មានឥណទាន ដំណោះស្រាយផ្នែកវិភាគ និងសេវារបាយការណ៍ឥណទាន ថ្ងៃនេះ បានចេញផ្សាយរបាយការណ៍សន្ទស្សន៍ឥណទាន អ្នកប្រើប្រាស់ប្រចាំត្រីមាសទី 2 ឆ្នាំ 2016 ដោយធ្វើការវាស់វែងលើការស្នើសុំឥណទាន កាតព្វកិច្ចឥណទាន និងគុណភាពឥណទានរបស់អ្នកប្រើប្រាស់ លើហិរញ្ញវត្ថុផ្ទាល់ខ្លួន ប័ណ្ណឥណទាន និងកម្ចីអចលនទ្រព្យ។
សន្ទស្សន៍បានបង្ហា្ញញអំពីការប្រែប្រួល នៃការស្នើសុំឥណទាន កាតព្វកិច្ចឥណទាន និងគុណភាពឥណទាននៅត្រីមាសក្នុងខែមិថុនា ឆ្នាំ 2016 ។ ពីមួយត្រីមាសទៅមួយត្រីមាស ការស្នើសុំឥណទានអ្នកប្រើប្រាស់បានធ្លាក់ចុះ 25 % ខណៈពេលដែលកាតព្វកិច្ចរឥណទានបន្ដកើនឡើងក្នុងអត្រា 7.86%។
ការស្នើសុំឥណទានអ្នកប្រើប្រាស់៖ ការស្នើសុំឥណទានអ្នកប្រើប្រាស់បង្ហាញឲ្យឃើញ អំពីបំណងនៃអ្នកប្រើប្រាស់ ដើម្បីទទួលបានឥណទានក្នុងទម្រង់ជាហរិញ្ញវត្ថុផ្ទាល់ខ្លួន ប័ណ្ណឥណទាន ឬកម្ចីអចលនទ្រព្យ។ នៅត្រីមាសក្នុងខែមិថុនា ការស្នើសុំឥណទានអ្នកប្រើប្រាស់បានធ្លាក់ចុះ 25% ខណៈពេលចំនួនស្នើសុំសរុបក៏ត្រូវបានធ្លាក់ចុះមក 23% ផងដែរ ប្រៀបធៀបទៅនឹងត្រីមាសទីមួយ ឆ្នាំ 2016 ។ ការស្នើសុំហិរញ្ញវត្ថុផ្ទាល់ខ្លួនបានថយចុះមក 26% ខណៈពេលចំនួនសរុបក៏បានធ្លាក់ចុះមក 27% ផងដែរ ។ ទន្ទឹមនេះ ការស្នើសុំកម្ចីអចលនទ្រព្យ នៅតែបន្ដធ្លាក់ចុះក្នុងអត្រា 10% ខណៈពេលដែលចំនួនកម្ចីសរុប បានធ្លាក់ចុះបន្តិចបន្តួចក្នុងអត្រា 1%។ ផ្ទុយមកវិញ ការស្នើសុំប័ណ្ណឥណទាន នៅតែបន្តកើនឡើងដល់ 69% ជាមួយនឹងការកើនឡើងនៃចំនួនសរុបដល់ 49%។ កម្ចីហិរញ្ញវត្ថុផ្ទាល់ខ្លួន និង កម្ចីអចលនទ្រព្យបានធ្លាក់ចុះក្នុងអត្រា 26% និង 10% នៅទូទាំងតំបន់ទាំងបួនដូចជា តំបន់បឹងទន្លេសាប តំបន់ឆ្នេរ តំបន់ទំនាប និង តំបន់ខ្ពង់រាប។ ទោះជាយ៉ាងណាក៏ដោយ ប័ណ្ណឥណទានបានកើនឡើងរហូតដល់ 69% នៅទូទាំងតំបន់នេះ។
កាតព្វកិច្ចឥណទានរបស់អ្នកប្រើប្រាស់៖ កាតព្វកិច្ចឥណទានរបស់អ្នកប្រើប្រាស់បង្ហាញ អំពីស្ថានភាពពិតនៃកម្ចីរបស់អ្នកប្រើប្រាស់ ដូចនៅក្នុងរបាយការណ៍ត្រីមាសនេះ។ កាតព្វកិច្ចឥណទានរបស់អ្នកប្រើប្រាស់រួម នៅតែបន្តកើនឡើងនៅក្នុងត្រីមាសនេះ។ នៅខែមិថុនា ឆ្នាំ 2016 ចំនួនឥណទានសរុបរបស់អ្នកប្រើប្រាស់កើនឡើងជិត 8% ស្មើ 631K (ត្រីមាសទីមួយនៃឆ្នាំ 2016 មាន 595K)។ សមតុល្យកម្ចីសរុបបានកើនឡើងដោយអត្រា 6.75% ស្មើ 2.73 ពាន់លានដុល្លារសហរដ្ឋអាមេរិក (ត្រីមាសទីមួយនៃឆ្នាំ 2016 មាន 256 ពាន់លានដុល្លារសហរដ្ឋអាមេរិក)។ ហិរញ្ញវត្ថុផ្ទាល់ខ្លួននៅតែមានប្រមាណ 85.70% នៃគណនីសរុប នៅពីក្រោយកម្ចីអចលនទ្រព្យ (9.30%) និងប័ណ្ណឥណទាន (5%)។ ដូចគ្នានេះដែរ ហិរញ្ញវត្ថុផ្ទាល់ខ្លួនមានចំណែកធំជាងគេបំផុត ដែលមានប្រមាណជា 55.32% នៃសមតុល្យកម្ចីសរុបរបស់អ្នកប្រើប្រាស់ (2.73% ពាន់លានដុល្លាសហរដ្ឋអាមេរិក) នៅពីក្រោយកម្ចីអចលនទ្រព្យ (43.98%) និងប័ណ្ណឥណទាន (0.70%)។ នៅទូទាំងតំបន់ទាំងអស់ ការកើនឡើងនៃគណនីសរុបរបស់ហិរញ្ញវត្ថុផ្ទាល់ខ្លួន ប័ណ្ណឥណទាន និងកម្ចីអចលនទ្រព្យមានចំនួន 7% ដែលមានអត្រាប្រហាក់ប្រហែលទៅនឹងត្រីមាសទីមួយនៃឆ្នាំនេះ។
ក្រុមហ៊ុន ក្រេឌីត ប្យួរ៉ូ ខេមបូឌា គឺជាក្រុមហ៊ុនឈានមុខគេ ក្នុងការផ្តល់នូវសេវាព័ត៌មានហិរញ្ញវត្ថុ ឧបករណ៍វិភាគទិន្នន័យ និង របាយការណ៍ឥណទាន ទៅដល់ស្ថាប័នហិរញ្ញវត្ថុទាំងអស់ នៅក្នុងប្រទេសកម្ពុជា។