រាជធានីភ្នំពេញ ថ្ងៃទី ០៨ ខែសីហា ឆ្នាំ ២០១៩
សេចក្តីសង្ខេបរបាយការណ៍៖
ដំណើរការឥណទានលក្ខណៈបុគ្គល បានបន្តកើនឡើងនៅគ្រប់តំបន់ទាំងអស់ ទាំងចំនួនគណនីឥណទាននិងសមតុល្យឥណទានសរុបទាំងនោះ។ បើទោះជាការធ្លាក់ចុះនៃចំនួននៃការស្នើសុំឥណទាន លក្ខណៈបុគ្គល ដែលជានិន្នាការធម្មតាក្នុងត្រីមាសទី២ ក្នុងរយៈពេលប៉ុន្មានឆ្នាំកន្លងមកនេះ ក៏កម្រិតភាគរយនៃការធ្លាក់ចុះចំនួនទឹកប្រាក់នៃការស្នើសុំឥណទានលក្ខណៈបុគ្គលក្នុងត្រីមាសនេះធៀបនឹងត្រីមាសមុន មានកម្រិតទាបជាង រយៈពេលដូចគ្នាក្នុងឆ្នាំ២០១៨។ ឥណទានមិនដំណើរការលើសពី៣០ថ្ងៃ (30+DPD) បានថយចុះបន្តិច ខណៈពេលដែលកទំហំទឹកប្រាក់នៃឥណទានមិនដំណើរការលើសពី៣០ថ្ងៃ (30+DPD) នៅក្នុងតំបន់ឆ្នេរបានធ្លាក់ចុះបើប្រៀបធៀបទៅនឹងត្រីមាសមុន។
ការស្នើសុំឥណទានលក្ខណៈបុគ្គល ៖ បង្ហាញអំពីបំណងរបស់អ្នកប្រើប្រាស់ក្នុងការទទួលបានឥណទានក្នុងលក្ខណៈជា ហិរញ្ញវត្ថុផ្ទាល់ខ្លួន ប័ណ្ណឥណទាន និង កម្ចីអចលនទ្រព្យ ។
នៅត្រឹមត្រីមាសទី២ នៃឆ្នាំ២០១៩នេះ ចំនួនអតិថិជនដែលព្យាយាមស្នើសុំឥណទានក្នុងទម្រង់៣ផ្សេងៗគ្នាដូចជា ហិរញ្ញវត្ថុផ្ទាល់ខ្លួន (Personal Finance) , ប័ណ្ណឥណទាន (Credit Cards) និងកម្ចីអចលនទ្រព្យ (Mortgage) បានធ្លាក់ចុះ ធៀបនឹងត្រីមាសមុន។ ការធ្លាក់ចុះជារួម គឺក្នុងកម្រិត -១៩.២៩% ស្ថិតនៅក្នុងលក្ខណៈសមរម្យមួយ ធៀបទៅឆ្នាំមុនៗ ដែលតែងតែមានការធា្លក់ចុះក្នុងត្រីមាសទី២។
ការធ្លាក់ចុះនេះគឺដោយសារតែមានការថយចុះខ្លាំងនៃការស្នើសុំកម្ចីអចលនទ្រព្យ -៣៦%។ នេះបង្ហាញពីស្ថានភាពជាក់ស្តែងដែលគ្រប់តំបន់ទាំងអស់មានការធ្លាក់ចុះ ដោយនៅតំបន់មាត់សមុទ្រមានការធ្លាក់ចុះខ្លាំងជាងគេនៃការសើ្នសុំកម្ចីអចលនទ្រព្យក្នុងកម្រិត -៤៩%។ ចំនួននៃការធ្លាក់ចុះតិចបំផុតគឺ ការស្នើរសុំ ប័ណ្ណឥណទាន -៩% ដែលគួរអោយកត់សម្គាល់ថាទាបជាងត្រីមាសទី១ដែលធ្លាក់ចុះ-២០% ។
ទំហំទឹកប្រាក់នៃការស្នើសុំឥណទានលក្ខណៈបុគ្គលក៏បានធ្លាក់ចុះកម្រិត -៩% ផងដែរ ដែលទាបជាងរយៈពេលដូចគ្នាកាលពីឆ្នាំមុន (ត្រីមាសទី២ ក្នុងឆ្នាំ២០១៨៖ -១៤%)។ នេះ ដោយសារតែការធ្លាក់ចុះនៃទំហំទឹកប្រាក់នៃការស្នើសុំហិរញ្ញវត្ថុផ្ទាល់ខ្លួន -១០% និងកម្ចីអចលនទ្រព្យ -៥%។ ទោះបីជាយ៉ាងណាក៏ដោយ ទំហំទឹកប្រាក់នៃការស្នើសុំប័ណ្ណឥណទាន បានកើនឡើង +២% ធៀបទៅនឹងត្រីមាសមុន។
ដំណើរការឥណទានលក្ខណៈបុគ្គល៖ បង្ហាញអំពីស្ថានភាពឥណទានជាក់ស្ដែង រាយការណ៍នៅដំណាច់ត្រីមាស។
គិតត្រឹមខែមិថុនា ឆ្នាំ២០១៩ ចំនួនគណនីឥណទានលក្ខណៈបុគ្គលបានបន្តកើនឡើងជាលំដាប់ ក្នុងកម្រិត +៥.០៣% ធៀបត្រីមាសមុន។ នេះ បានធ្វើអោយចំនួនគណនីឥណទានលក្ខណៈបុគ្គលសរុប ទូទាំងប្រទេសបានកើនឡើងដល់ ១.១៩លានគណនី ស្មើនឹង ៣៧.៦៧% នៃចំនួនគណនីឥណទានទីផ្សារសរុប។ នៅក្នុងចំណោមតួលេខនេះ គឺ៨១.៦៨% ជាឥណទានហិរញ្ញវត្ថុផ្ទាល់ខ្លួន ១១.០៤% ជាកម្ចីអចលនទ្រព្យ និង ៧.២៩% ជាប័ណ្ណឥណទាន ។ ការកើនឡើងនេះ ត្រូវបានគេមើលឃើញជាទូទៅនៅទូទាំងតំបន់ទាំងបួននៃព្រះរាជាណាចក្រកម្ពុជា ដោយតំបន់ទំនាបឈានមុខគេដោយចំនួនគណនីឥណទានលក្ខណៈបុគ្គលមានកំណើន + ៥.៨%។
ចំណែកឯសមតុល្យឥណទានលក្ខណៈបុគ្គល ក៏បានបន្តកើនឡើងជាលំដាប់ក្នុងកម្រិត +៦.៨០%ធៀបនឹងត្រីមាសមុន។ គិតត្រឹមចុងខែមិថុនា ឆ្នាំ២០១៩ សមតុល្យឥណទានលក្ខណៈបុគ្គលសរុបមានទំហំ ៧.១៦ប៊ីលានដុល្លារអាមេរិច ស្មើនឹង ៣០.២២% នៃសមតុល្យឥណទានអតិថិជនទីផ្សារសរុប។
សមតុល្យហិរញ្ញវត្ថុផ្ទាល់ខ្លួននៅតែបន្តចំណែកធំជាងគេ (៥១.៤៦%) នខណៈដែលសមតុល្យកម្ចីអចលនទ្រព្យមានចំនួន ៤៧.៧៩%។ សមតុល្យប័ណ្ណឥណទាន នៅតែមានចំណែកតូចត្រឹម០.៧៥% នៃសមតុល្យសរុប។ ជារួម សមតុល្យឥណទានលក្ខណៈបុគ្គលនៅក្នុងប្រទេសកម្ពុជា ត្រូវបានមើលឃើញថាមានកំណើនជាវិជ្ជមាននៅគ្រប់តំបន់ទាំងអស់ ក្នុងនោះ តំបន់ទំនាបឈានមុខគេ (+៧.៥%) បន្ទាប់មកតំបន់ទន្លេសាប និងតំបន់ឆ្នេរដែលមានកំណើនរៀងដូចគ្នា(+៤.៧%) និងតំបន់ខ្ពង់រាបទាបជាងបន្តិច (+២%)។
គុណភាពឥណទានលក្ខណៈបុគ្គល ៖ ឆ្លុះបញ្ចាំងអំពីលទ្ធភាពទូទាត់សងរបស់កូនបំណុលទៅតាមថ្ងៃកំណត់ ដោយប្រើប្រាស់អនុបាតនៃឥណទានមិនដំណើរការលើសពី៣០ថ្ងៃ។
គិតត្រឹមត្រីមាសទី២ ឆ្នាំ២០១៩នេះ អនុបាតឥណទានមិនដំណើរការលើសពី៣០ថ្ងៃ (30+ DPD) មានការធ្លាក់ចុះបន្តិចពី ១.២៤%នៅត្រីមាសមុន មកត្រឹម១.១៩% ក្នុងត្រីមាសនេះ។ ក្នុងចំណោមផលិតផលឥណទានទាំងបី គឺ ប័ណ្ណឥណទាន មានអនុបាតឥណទានមិនដំណើរការលើសពី៣០ថ្ងៃ មានការកើនឡើងបន្តិច ពី១.៤២%នៅត្រីមាសមុន មក២.៦៣%នៅត្រីមាសនេះ។
ចំនួនទឹកប្រាក់ឥណទានមិនដំណើរការលើសពី៣០ថ្ងៃមានការកើនឡើងជារួម +២.៧៦% នៅទូទាំងតំបន់ ធៀបនឹងត្រីមាសមុន។ កំណើននេះមាននៅតំបន់ទាំងបី ប៉ុន្តែវាបានធ្លាក់ចុះនៅតំបន់មាត់សមុទ្រចំនួន ៥.១%។
ចំនួនអតិថិជនដែលមានកម្ចីនៅមួយស្ថាប័ននៅតែមានកម្រិតខ្ពស់ ៧៦.៩៥% នៃចំនួនអតិថិជនទាំងអស់។ ចំណែកឯអតិថិជនដែលមានកម្ចីច្រើនស្ថាប័ននៅតែមានកម្រិតទាបដដែលត្រឹម ២៣.០៥%។ ៦៦.៣៩% នៃអតិថិជនប្រើប្រាស់ឥណទានលក្ខណៈបុគ្គល នៅតែមានគណនីឥណទានចំនួន១ នៅពេលដែលអ្នកមានគណនីឥណទានចំនួន២ មាន២៦.៥៦% ហើយគណនីឥណទានចំនួន៣ មាន៧.៧០% ហើយប្រហែល២.៣៥% មានគណនីឥណទានលើសពី៣។
លោក អឿ សុធារ័ត្ន ប្រធាននាយកប្រតិបត្តិនៃការិយាល័យឥណទានកម្ពុជា មានប្រសាសន៍ថា «នៅក្នុងត្រីមាសនេះគឺ មិនខុសពីឆ្នាំមុនៗនោះទេ ចំនួននៃការស្នើសុំឥណទានលក្ខណៈបុគ្គលធ្លាក់ចុះ នៅត្រីមាសទី២។ ទោះបីយ៉ាងណា បើប្រៀបធៀបនឹងរយៈពេលដូចគ្នា ក្នុងឆ្នាំ២០១៨ ចំនួននៃការស្នើសុំឥណទានលក្ខណៈបុគ្គលសរុបបានកើនឡើង +៩,០៣% ខណៈដែលទំហំទឹកប្រាក់នៃការស្នើសុំឥណទាន កើនឡើងជិតទ្វេដង។»
លោកបន្តថា «ចំនួនគណនីឥណទានលក្ខណៈបុគ្គលបានកើនឡើងជាលំដាប់ ចាប់តាំងពី ឆ្នាំ២០១៨ ក្នុងចន្លោះពី ៥%ទៅ៧% ក្នុងត្រីមាសនីមួយៗ។ ខណៈ សមតុល្យឥណទានលក្ខណៈបុគ្គលសរុបកើនឡើង ចន្លោះពី ៦% ទៅ ៨%។ ជារួម អនុបាតនៃឥណទានមិនដំណើរការលើសពី៣០ថ្ងៃ របស់ផលិតផលឥណទានទាំងបី នៅតែមានលក្ខណៈល្អប្រសើរ និងនៅតែបន្តស្ថិតនៅក្នុងកម្រិតទាប ១.១៩%។»
ចុចទីនេះដើម្បីទាញយករបាយការណ៍។
#ចប់#