ភ្នំពេញ, ថ្ងៃទី២៧ ខែឧសភា ឆ្នាំ២០២១, ក្រុមហ៊ុនក្រេឌីត ប្យួរ៉ូ (ខេមបូឌា) ខូ អិលធីឌី (ស៊ីប៊ីស៊ី) និង ក្រុមហ៊ុនវីត្រាស់ អឹព្រេហ្សល ខូ អិលធីឌី (វីត្រាស់) បានចុះហត្ថលេខាលើអនុស្សរណៈនៃការយោគយល់គ្នា ដើម្បីស្វែងរកកិច្ចសហប្រតិបត្តិការរវាងស្ថាប័នទាំងពីរ ទៅលើកិច្ចការដែលផ្តល់ជាប្រយោជន៍ទាំងសងខាង ពាក់ព័ន្ធទៅនឹងការវាយតម្លៃអចលនទ្រព្យ និងការគ្រប់គ្រងហានិភ័យឥណទាន ដែលអាចផ្តល់អត្ថប្រយោជន៍ផ្ទាល់ទៅកាន់បុគ្គលអ្នកខ្ចីម្នាក់ៗ ព្រមទាំងស្ថាប័នផ្តល់ប្រាក់កម្ចីទាំងអស់ទូទាំងព្រះរាជាណាចក្រកម្ពុជា។
អនុស្សរណៈនៃការយោគយល់គ្នានេះ ត្រូវបានចុះហត្ថលេខាតាមរយៈប្រព័ន្ធអនឡាញដោយ លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុន ស៊ីប៊ីស៊ី និងលោកវង្ស សុខាល ប្រធានក្រុមប្រឹក្សាភិបាលនៃក្រុមហ៊ុនវីត្រាស់ ដោយមានវត្តមានរបស់គណៈគ្រប់គ្រងរបស់ក្រុមហ៊ុនទាំងពីរផងដែរ។
អនុស្សរណៈនៃការយោគយល់គ្នានេះបានត្រួសត្រាយផ្លូវសម្រាប់ ស៊ីប៊ីស៊ី និង វីត្រាស់ក្នុងការរួមបញ្ចូលគ្នានូវចំណុចខ្លាំងរៀងៗខ្លួន និងស្វែងរកឱកាសដែលមានវិសាលភាពក្នុងកម្រិតវិស័យទាំងមូល ដើម្បីបំពេញតម្រូវការរស្ថាប័នហិរញ្ញវត្ថុទាំងអស់ដែលជាសមាជិករបស់ស៊ីប៊ីស៊ី ក្នុងការធ្វើការវាយតម្លៃហានិភ័យឥណទានយ៉ាងមានប្រសិទ្ធភាព និងទូលំទូលាយ នៅដំណាក់កាលស្នើសុំឥណទាន តាមរយៈការប្រើប្រាស់ដំណោះស្រាយវាយតម្លៃអចលនទ្រព្យពី វីត្រាស់ បូករួមនឹងរបាយការណ៍ឥណទាន និងខេស្ករ ដែលបច្ចុប្បន្ននេះសមាជិកទាំងអស់អាចទទួលបានពី ស៊ីប៊ីស៊ី។
សន្ទស្សន៍ឥណទានលក្ខណៈបុគ្គលសម្រាប់ត្រីមាសទីមួយក្នុងឆ្នាំ២០២១ ដែលបានចេញផ្សាយដោយស៊ីប៊ីស៊ីថ្មីៗនេះ បង្ហាញថា ៥១,៧២% នៃផលប័ត្រសមតុល្យឥណទានលក្ខណៈបុគ្គលសរុប គឺបានមកពីកម្ចីគេហដ្ឋាន។ ក្នុងរយៈពេលប៉ុន្មានឆ្នាំចុងក្រោយនេះ ទីផ្សាអចលនទ្រព្យមានសន្ទុះរីកចម្រើនគួរឲ្យកត់សម្គាល់ ជាមួយនឹងតម្រូវការ និងការផ្គត់ផ្គង់ទៅលើកម្ចីគេហដ្ឋានក៍បានកើនឡើងដែរ។ បន្ថែមពីនេះទៀត នេះក៏ជារឿងធម្មតាដែរ ក្នុងការយកទ្រព្យបញ្ចាំជាអចលនទ្រព្យទៅប្រើប្រាស់ ដើម្បីទទួលបានឥណទានលក្ខណៈបុគ្គល និងឥណទានលក្ខណៈក្រុមហ៊ុនផ្សេងៗផងដែរ។
លោក អឿ សុធារ័ត្ន ប្រធាននាយកប្រតិបត្តិនៃស៊ីប៊ីស៊ី បានមានប្រសាសន៍ថា “យើងបានចុះអនុស្សរណៈនៃការយោគយល់គ្នានេះក្នុងគោលបំណងស្វែងរកសក្តានុពលនៃកិច្ចសហប្រតិបត្តិការជាមួយវីត្រាស់ ដើម្បីធ្វើពិពិធកម្មផលប័ត្រដំណោះស្រាយរបស់យើងបន្ថែមទៀត ដើម្បីពង្រឹងតួនាទីរបស់យើងដែលជាហេដ្ឋារចនាសម្ព័ន្ធហិរញ្ញវត្ថុដ៍ចំបងមួយនៅប្រទេសកម្ពុជា ដែលអាចជួយដល់សមាជិកជាង ១៦៥នាក់ របស់យើងក្នុងការធ្វើការសម្រេចចិត្តតាមរយៈទិន្នន័យយ៉ាងមានប្រសិទ្ធភាព។ យើងបានបើកចំហរចំពោះភាពជាដៃគូរទិន្នន័យយុទ្ធសាស្រ្ត និងផលិតផល ដែលអាចនាំយកមកនូវអត្ថប្រយោជន៍កាន់តែធំទូលំទូលាយ ដើម្បីលើកកម្ពស់ប្រសិទ្ធភាពទីផ្សារឥណទាន និងតម្លាភាពនៅក្នុងប្រទេសកម្ពុជា។”
លោក វង្ស សុខាល ប្រធានក្រុមប្រឹក្សាភិបាលនៃក្រុមហ៊ុនវីត្រាស់ បានមានប្រសាសន៍ថា “ដោយបទពិសោធន៍របស់អតិថិជនគឺមានសារៈសំខាន់បំផុតសម្រាប់ ប្រព័ន្ឋបច្ចេកវិទ្យា អ៊ីនឌីខេសិន ផ្លើស ភ្លេតហ្វម ដែលជាសេវាកម្មវាយតម្លៃទ្រព្យសម្បត្តិអនឡាញដែលអាចជឿទុកចិត្តបានបំផុតរបស់ វីត្រាស់ អឹព្រេហ្សល បានធ្វើឲ្យការចុះអនុស្សរណៈនៃការយោគយល់គ្នានេះត្រូវបានព្រមព្រៀងឡើងជាមួយស៊ីប៊ីស៊ី។ ការធ្វើសមាហរណកម្មរវាងរបាយការណ៍ឥណទានរបស់ស៊ីប៊ីស៊ី និងប្រព័ន្ឋបច្ចេកវិទ្យា អ៊ីនឌីខេសិន ផ្លើស ភ្លេតហ្វម របស់វីត្រាស់នឹងបើកទូលាយមិនត្រឹមតែការទទួលបានពត៌មានស្ថានភាពឥណទាន និងរបាយការណ៍ប្រវត្តិឥណទានតែប៉ុណ្ណោះទេ ប៉ុន្តែថែមទាំងផ្តល់ជូននូវសេវាកម្មវាយតម្លៃទ្រព្យសម្បត្តិដែលអាចជឿទុកចិត្តបាន រហ័ស សុវត្ថិភាព និងងាយស្រួលជាងមុនក្នុងកន្លែងតែមួយសម្រាប់សមាជិតស៊ីប៊ីស៊ីទាំងជាង ១៦៥ ដែលមានស្រាប់។ ជាមួយគ្នា ក្រុមហ៊ុនទាំងពីររបស់យើងមានគោលបំណងរួមគ្នាតែមួយ ដែលយើងនឹងប្រើដំណោះស្រាយបំពេញបន្ថែមដែលអាចផ្តល់លទ្ធភាពក្នុងការបំពេញតម្រូវការអតិថិជនរបស់យើងប្រកបដោយប្រសិទ្ធភាពនិងតម្លាភាព និងលើកកម្ពស់ទម្រង់វិជ្ជាជីវៈរបស់វិស័យរបស់យើង ក៍ដូចជាបំពេញតម្រូវការសហគមន៍ទាំងមូល និងតម្រូវការឥណទានរបស់ប្រជាជនក្នុងព្រះរាជាណាចក្រកម្ពុជា”។
អំពីក្រុមហ៊ុនក្រេឌីត ប្យួរ៉ូ (ខេមបូឌា) ខូ អិលធីឌី(ស៊ីប៊ីស៊ី)
ស៊ីប៊ីស៊ី គឺជាក្រុមហ៊ុនឈានមុខគេ ក្នុងការផ្តល់នូវសេវាព័ត៌មានហិរញ្ញវត្ថុ ឧបករណ៍វិភាគទិន្នន័យ និងរបាយការណ៍ឥណទាន ទៅដល់ស្ថាប័នហិរញ្ញវត្ថុទាំងអស់ និងអ្នកប្រើប្រាស់ទាំងអស់ នៅក្នុងប្រទេសកម្ពុជា។ ចាប់តាំងពីឆ្នាំ ២០១២ មក ស៊ីប៊ីស៊ី បានជួយដល់អតិថិជន និងសមាជិករបស់ខ្លួនទាំងអស់ ក្នុងការគ្រប់គ្រងហានិភ័យ និងធ្វើការសម្រេចចិត្តបានឆាប់រហ័សតាមរយៈសេវាកម្មដូចជា៖ របាយការណ៍ឥណទានផ្ទាល់ខ្លួន, របាយការណ៍ឥណទានក្រុមហ៊ុន, ខេ ស្ករ, សេវាវិភាគទិន្នន័យ, សេវាតាមដានឥណទាន, សេវាត្រួតពិនិត្យឥណទាន និងដំណោះស្រាយទិន្នន័យ តាមតម្រូវការ។ ស៊ីប៊ីស៊ីបានបម្រើទៅដល់សមាជិកដែលជាគ្រឹះស្ថានហិរញ្ញវត្ថុច្រើនជាង ១៦៥ ស្ថាប័ន ដូចជា៖ ធនាគារពាណិជ្ជ ធនាគារឯកទេស ស្ថាប័នទទួលប្រាក់បញ្ញើមីក្រូហិរញ្ញវត្ថុ គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យា និងស្ថាប័នឥណទានជនបទ។
អំពីក្រុមហ៊ុនវីត្រាស់ អឹព្រេហ្សល ខូ អិលធីឌី
ក្រុមហ៊ុនវីត្រាស់ អឹព្រេហ្សល គឺជាក្រុមហ៊ុនវាយតម្លៃឈានមុខគេមួយនៅកម្ពុជា ដែលបានកំពុងផ្តល់សេវាកម្មវាយតម្លៃអចលនទ្រព្យជូន អតិថិជន ស្ថាប័ននានាទាំងក្នុងស្រុក និងអន្តរជាតិ រួមទាំងស្ថាប័នហិរញ្ញវត្ថុ និង វិនិយោគិននៅក្នុងវិស័យលំនៅដ្ឋានពាណិជ្ជកម្ម និងវិស័យអចលនទ្រព្យនៅកម្ពុជា។ ជិត ២ ទស្សវត្ស ចាប់តាំងពីការបង្កើតក្រុមហ៊ុនក្នុងឆ្នាំ ២០០៤ មក យើងផ្តល់សេវាកម្មវាយតម្លៃតាមរយៈប្រព័ន្ឋបច្ចេកវិទ្យា
អ៊ីនឌីខេសិន ផ្លើស ភ្លេតហ្វម យ៉ាងទូលំទូលាយដល់ ស្ថាប័នហិរញ្ញវត្ថុ ក្រុមហ៊ុនវិនិយោគ ក្រុមហ៊ុនអចលនទ្រព្យ នាយកដ្ឋានរដ្ឋាភិបាល អង្គការក្រៅរដ្ឋាភិបាល ក្រុមហ៊ុននានា ប្រកបដោយតម្លាភាព រហ័សទាន់ចិត្ត និងលក្ខណៈត្រឹមត្រូវ ដែលប្រកបដោយក្រមសីលធម៌ វិជ្ជាជីវៈជូនដល់អតិថិជន។