នាថ្ងៃទី២២ ខែមិនា ឆ្នាំ២០១៨ កន្លងទៅនេះ ការិយាល័យឥណទានកម្ពុជា (ហៅកាត់ថាស៊ីប៊ីស៊ី) បានរៀបចំជួបប្រជុំ គណៈកម្មការការងារសមាជិកលើកទីមួយ សំរាប់ឆ្នាំ ២០១៨ របស់ខ្លួន នៅសណ្ឋាគារភ្នំពេញ ដោយមានតំណាងអញ្ជើញមកពីគ្រប់ស្ថាប័នហិរញ្ញវត្ថុជាសមាជិក ផងដែរ។
ក្នុងកិច្ចប្រជុំលើកនេះ រួមមានកិច្ចពិភាក្សារអំពីចំនុចដែលបានលើកឡើង កាលពីកិច្ចប្រជុំលើកមុនដើម្បីធ្វើសេចក្តីសំរេចជាផ្លូវការ និង មានការបោះឆ្នោតជ្រើសតាំងប្រធាន និងអនុគណៈកម្មការការងារសមាជិក ដែលវាជាការបោះឆ្នោតរៀងរាល់២ឆ្នាំម្តង។
ក្នុងការបោះឆ្នោត ប្រធានគណៈកម្មការការងារសមាជិកដែលនឹងចូលរួមចំណែក ក្នុងការងារប្រតិបត្តិការគណៈកម្មការនេះ បានទៅលើលោក រុំ វណ្ណារ៉ា អញ្ជើញមកពីគ្រឹះស្ថានមីក្រូហិរញ្ញវត្ថុ ក្រេឌីត ហើយអនុគណៈកម្មការការងារសមាជិក បានទៅលើលោកស្រី ស្រ៊ាង ឡាលីន អញ្ជើញមកពីធនាគារ ស៊ីអាយអិមប៊ី។
គួរបញ្ជាក់ថា គណៈកម្មការការងារសមាជិករបស់ស៊ីប៊ីស៊ី គឺជាក្រុមថ្នាក់ដឹកនាំចាត់តាំងដ៏មានប្រសិទ្ធិភាព ក្នុងការទំនាក់ទំនង ទៅកាន់អ្នកប្រើប្រាស់ប្រចាំថ្ងៃ របស់យើង ហើយវាជាមធ្យោបាយមួយ ដែលយើងអាចធ្វើការទំនាក់ទំនង ដើម្បីផ្តល់ព័ត៌មានផ្សេងៗ ដល់សមាជិកទាំងអស់ ទន្ទឹមនឹងនោះក៏ដើម្បីទទួលយកពត៌មានពីសមាជិកខ្លួនផងដែរ។
គណៈកម្មការនេះ ធ្វើការជួបប្រជុំគ្នារៀងរាល់ ៣ខែម្តង ដោយមានការចូលរួមពីសមាជិកទាំងអស់។ ក្រុមថ្នាក់ដឹកនាំចាត់តាំងនេះបានអនុវត្តយ៉ាងហ្មត់ចត់ និងប្រកបដោយគុណតម្លៃ ព្រមទាំងប្រសិទ្ធិភាពខ្ពស់សំរាប់សមាជិករបស់ស៊ីប៊ីស៊ី ក៏ដូចជាវិស័យទាំងមូល ដោយផ្តល់ឱកាសអោយយើងអាចកែសម្រួលលទ្ធផល អោយកាន់តែប្រសើឡើងជាលំដាប់ តាមរយៈការផ្តល់ឱកាស់ដល់សមាជិកទាំងអស់លើកឡើងនូវកង្វល់ ការស្នើសុំ និងគំនិតផ្សេងៗ ដើម្បីផ្តល់លទ្ធផលជាវិជ្ជមានដល់សមាជិកគ្រប់ស្ថាប័ន។