ប្រធានក្រុមប្រឹក្សាភិបាល មានសេចក្តីរីករាយក្នុងការប្រកាសជាផ្លូវការនៃការតែងតាំង លោក អឿ សុធារ័ត្ន ជាប្រធាននាយកប្រតិបត្តិ របស់ការិយាល័យឥណទានកម្ពុជា ចាប់ពីថ្ងៃទី៣០ ខែសីហា ឆ្នាំ២០១៧។
សុធារ័ត្ន គឺជាសមាជិកដ៏សំខាន់ម្នាក់ក្នុងជួរថ្នាក់ដឹកនាំរបស់ ស៊ីប៊ីស៊ី ចាប់តាំងពីឆ្នាំ ២០១៥ និងទទួលបន្ទុកជាប្រធាននាយកប្រតិបត្តិស្តីទីក្នុង ខែវិច្ឆិកា ឆ្នាំ ២០១៦។
សុធារ័ត្ន គឺជាអ្នកជំនាញផ្នែកអាជីវកម្ម ដែលមានបទពិសោធន៍ជាច្រើនក្នុងផ្នែកធនាគារ និងមីក្រូហិរញ្ញវត្ថុ។ លោក មានបទពិសោធន៍ជាង ១២ឆ្នាំ ក្នុងផ្នែកស្រាវជ្រាវទីផ្សារ និងសង្គម ជាមួយអង្គការក្នុង និងក្រៅប្រទេស។
លោក សុធារ័ត្ន បានចាប់ផ្តើមបំរើការងារនៅ ស៊ីប៊ីស៊ី ក្នុងតួនាទីជានាយកអភិវឌ្ឍន៍អាជីវកម្ម នៅក្នុង ខែកញ្ញា ឆ្នាំ២០១៣ ។ តាមរយៈស្នាដៃដ៏ឆ្នើមក្នុងការងារ លោកបានបង្កើតអោយមានផលិតផល និងសេវាកម្មបន្ថែមសម្រាប់បំរើដល់ទីផ្សារដូចជា ប្រព័ន្ធតាមដានឥណទាន របាយការណ៍វិភាគទិន្ន័យ សេវាត្រួតពិនិត្យឥណទាន និងដំណោះស្រាយទិន្ន័យតាមតម្រូវការជាច្រើនផ្សេងទៀត។ មុនពេលចូលបំរើការងារជាមួយ ស៊ីប៊ីស៊ី លោក សុធារ័ត្ន គឺជាប្រធានផ្នែកស្រាវជ្រាវ និង អភិវឌ្ឍន៍ផលិតផល នៅក្នុងគ្រឹះស្ថានមីក្រូហិរញ្ញវត្ថុមួយ ក្នុងចំណោមគ្រឹះស្ថានមីក្រូហិរញ្ញវត្ថុឈានមុខគេទាំងបីនៅកម្ពុជា និងជាកន្លែងដែលលោក ទទួលបន្ទុកលើផ្នែកស្រាវជ្រាវទីផ្សារ និងអភិវឌ្ឍន៍ផលិតផលផងដែរ។ ក្នុងចំណោមសមិទ្ធិផលការងារជាច្រើនកន្លងមក លោកបានបង្កើតក្រុមស្រាវជ្រាវ និង អភិវឌ្ឍន៍ផលិតផល និងបានខិតខំប្រឹងប្រែងអភិវឌ្ឍន៍ទីផ្សារថ្មីៗតាមរយៈ ការបង្កើតសាខាថ្មីជាង ៥០ នៅទូទាំងប្រទេស។ លោក សុធារ័ត្ន ក៏បានសម្រេចនូវសមិទ្ធិផលដ៏សំខាន់ជាមួយវិទ្យាស្ថានគ្រប់គ្រងទឹកអន្តរជាតិគ្រប់គ្រងទឹក និងអង្គការឃែរអន្តរជាតិនៅក្នុងប្រទេសកម្ពុជាដែលជាកន្លែងដែលលោក បានបំរើការពីមុន។
លោក សុធារ័ត្ន បានបញ្ចប់ការសិក្សាពីសាកលវិទ្យាល័យភូមិន្ទកសិកម្ម ជំនាញសេដ្ឋកិច្ចកសិកម្ម និងទទួលបានសញ្ញាប័ត្រអនុបណ្ឌិតផ្នែកគ្រប់គ្រងពីសាកលវិទ្យាល័យន័រតុន។ លោកក៏ជាគ្រូបង្គោលផ្នែកមីក្រូហិរញ្ញវត្ថុក្រោមគម្រោងសហប្រតិបត្តិការរវាង មជ្ឈមណ្ឌលសិក្សាអភិវឌ្ឍន៍ក្រុងតូក្យូ និងវិទ្យាស្ថានធនាគារអភិវឌ្ឍន៍អាស៊ីផងដែរ។