នៅថ្ងៃទី២១ -២២ ខែឧសភា ឆ្នាំ២០១៥ ការិយាល័យឥណទានកម្ពុជា (CBC) សហការជាមួយសាជីវកម្មហិរញ្ញវត្ថុអន្តរជាតិ (IFC) បានរៀបចំសិក្ខាសាលាចំនួនពីរ ដើម្បីលើកកម្ពស់ការយល់ដឹងពីការិយាល័យឥណទាន នៅសណ្ឋាគារអ៊ីនធើកុងទីណុងតាល់ ក្នុងទីក្រុងភ្នំពេញ។
គោលបំណងនៃសិក្ខាសាលានេះ គឺដើម្បីផ្តល់ព័ត៌មានស៊ីជម្រៅស្តីពីប្រតិបត្តិការ នៃការិយាល័យឥណទានកម្ពុជា អត្ថប្រយោជន៍ក្នុងការចូលរួម ជាសមាជិករបស់ការិយាល័យឥណទាន និងគោលការណ៍ រួមទាំងបទបញ្ញត្តិផ្សេងៗដែលទាក់ទង។
អ្នកចូលរួមសរុបមានចំនួន ១២២នាក់ មកពីអង្គការក្រៅរដ្ឋាភិបាល ហាងទទួលបញ្ចាំ ក្រុមហ៊ុនធានារ៉ាប់រង អ្នកផ្តល់សេវាទឹកភ្លើង និងអ្នកផ្តល់សេវាអ៊ីនធើណិត បានចូលរួមសិក្ខាសាលានេះ។ សិក្ខាសាលាបានចាប់ផ្តើមដោយមតិស្វាគមន៍ពីលោក ម៉ិល សុគីម មន្ត្រីប្រតិបត្តិ មកពីសាជីវកម្មហិរញ្ញវត្ថុអន្តរជាតិ។ បន្ទាប់មកលោក ច្រឹក សុធា ប្រធាននាយកប្រតិបត្តិការ នៃការិយាល័យឥណទានកម្ពុជា បានធ្វើបទបង្ហាញពីទិដ្ឋភាពទូទៅ នៃការិយាល័យឥណទានកម្ពុជា។ លោក ភីតធឺ ដូក្លាស សៀរីន ទីប្រឹក្សានៃការិយាល័យឥណទាន និងគ្រប់គ្រងហានិភ័យ របស់សាជីវកម្មហិរញ្ញវត្ថុអន្តរជាតិ សម្រាប់កម្មវិធីការិយាល័យឥណទានពិភពលោក ក៏បានបកស្រាយការស្រាវជ្រាវអំពីអត្ថប្រយោជន៍ នៃរបាយការណ៍ឥណទាន។ សិក្ខាសាលាបានបញ្ចប់ជាមួយនឹងបទបង្ហាញស្តីពីតម្លៃ និងអត្ថប្រយោជន៍ក្នុងការចូលរួមជាមួយការិយាល័យឥណទានកម្ពុជា ដោយលោក អឿ សុធារ័ត្ន នាយកអភិវឌ្ឍន៍អាជីវកម្ម នៃការិយាល័យឥណទានកម្ពុជា។