ដើម្បីលើកកម្ពស់ចរន្តនៃការប្រើប្រាស់ប្រាក់រៀល ក្នុងដំណើរទូទាត់ផ្សេងៗនៅទូទាំងប្រទេស នាថ្ងៃទី២០ ខែមិនា ឆ្នាំ២០១៨ នៅមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) នៃសាកលវិទ្យាល័យភូមិន្ទភ្នំពេញ មានការប្រារព្ធ “ទិវាប្រាក់រៀល” ខួបលើកទី៣៨ នៃការដាក់ឱ្យចរាចរប្រាក់រៀលឡើងវិញ។ កម្មវិធីនេះត្រូវបានផ្តួចផ្តើមរៀបចំដោយធនាគារជាតិនៃកម្ពុជា ក្រោមការចូលរួម គាំទ្រដោយការិយាល័យឥណទានកម្ពុជា (CBC) និងស្ថាប័នមួយចំនួនផ្សេងទៀត។
ថ្លែងក្នុងកម្មវិធី លោកជំទាវ អ៊ុក ម៉ាលី ទេសាភិបាលរង ធនាគារជាតិនៃកម្ពុជា បានមានប្រសាសន៍ថា ការពង្រឹងប្រសិទ្ធភាព គោលនយោបាយរូបិយវត្ថុ និងអត្រាប្ដូរប្រាក់ នឹងរួមចំណែករក្សាស្ថេរភាពថ្លៃ និងស្ថេរភាពម៉ាក្រូសេដ្ឋកិច្ច និងហិរញ្ញវត្ថុ ខណៈពេលដែលសេដ្ឋកិច្ចជាតិមានការប៉ះទង្គិច ជាយថាហេតុណាមួយកើតឡើង។ ការចូលរួមប្រើប្រាស់ប្រាក់រៀលកាន់តែច្រើន នឹងធ្វើឱ្យកម្ពុជាទទួលបានផលចំណេញ ក្នុងការបង្កើនចំណូលពីការបោះពុម្ពក្រដាស់ប្រាក់ និងបង្កើន ចំណូលជូនរាជរដ្ឋាភិបាល ដើម្បីយកទៅអភិវឌ្ឍន៍សេដ្ឋកិច្ច និងការចំណាយផ្សេងៗ និងអាចកាត់បន្ថយភាពងាយរងឥទ្ធិពលពីការប្រែប្រួលនៃតម្លៃប្រាក់ដុល្លារអាម៉េរិក ជាដើម។
លោក អឿ សុធារ័ត្ន ប្រធាននាយកប្រតិបត្តិ ការិយាល័យឥណទានកម្ពុជា (CBC) បានមានប្រសាសន៍ថា “យើងខ្ញុំមានក្តីសោមនស្សន៌ និងគាំទ្រយ៉ាងមុតមាំចំពោះគំនិតផ្តួចផ្តើមអោយមានចរាចរប្រាក់រៀលក្នុងប្រទេស អោយកាន់តែច្រើនឡើង។ ក្នុងឆ្នាំនេះ ការិយាល័យឥណទានកម្ពុជា ក៏បានរៀបចំអោយមានការបើកប្រាក់បៀវត្សន៍បុគ្គលិក និងការទូទាត់ផ្សេងៗ ជាប្រាក់រៀលផងដែរ។ យើងខ្ញុំមានក្តីសប្បាយចិត្ត ដោយឃើញមានការកើនឡើងនៃចរាចរប្រាក់រៀលក្នុងទីផ្សារ ហើយយើងខ្ញុំសង្ឃឹមថា ប្រជាពលរដ្ឋ និងស្ថាប័នផ្សេងៗ នឹងបន្តជំរុញការប្រើប្រាស់ប្រាក់រៀលបន្ថែម ដើម្បីស្ថេរភាព និងការអភិវឌ្ឍន៍សេដ្ឋកិច្ចជាតិ កាន់តែខ្លាំងឡើង។
គួរបញ្ជាក់ថា ការិយាល័យឥណទានកម្ពុជា (CBC) គឺជាក្រុមហ៊ុនឈានមុខគេ ក្នុងការផ្តល់នូវសេវាព័ត៌មានហិរញ្ញវត្ថុ ឧបករណ៍វិភាគទិន្នន័យ និង របាយការណ៍ឥណទាន ទៅដល់ស្ថាប័នហិរញ្ញវត្ថុទាំងអស់ ក៏ដូចជាអ្នកប្រើប្រាស់ឥណទានទូទៅ នៅក្នុងប្រទេសកម្ពុជា។ ការិយាល័យឥណទានកម្ពុជា (CBC) ជួយដល់អតិថិជន និង សមាជិករបស់ខ្លួនទាំងអស់ ក្នុងការគ្រប់គ្រងហានិភ័យ និង ធ្វើការសម្រេចចិត្តហិរញ្ញវត្ថុបានឆាប់រហ័ស។