ការធ្វើបទបង្ហាញរបស់ប្រធាននាយកប្រតិបត្តិការិយាល័យឥណទានកម្ពុជា នៅសាកលវិទ្យាល័យ ភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច
កាលបរិច្ឆេទផ្សាយ: ថ្ងៃពុធ មិនា 7th, 2018នាថ្ងៃទី៥ ខែមិនា ឆ្នាំ២០១៨ លោក អឿ សុធារ័ត្ន ប្រធាននាយកប្រតិបត្តិការិយាល័យឥណទានកម្ពុជា (CBC) ត្រូវបានអញ្ជើញដើម្បីធ្វើបទបង្ហាញស្តីពី “តួនាទីរបស់ការិយាល័យឥណទានកម្ពុជា ក្នុងការចូលរួមជួយគាំទ្រស្ថាប័នហិរញ្ញវត្ថុ និង សេដ្ឋកិច្ចជាតិ” ដល់ក្រុមនិស្សិតថ្នាក់អនុបណ្ឌិត ដែលកំពុងសិក្សារលើជំនាញ គ្រប់គ្រងហានិភ័យ និងការគ្រប់គ្រងផ្នែកធានារ៉ាប់រង ធនាគារ និងហិរញ្ញវត្ថុ នៅសាកលវិទ្យាល័យ ភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច។
មិនខុសពីឆ្នាំមុនៗប៉ុន្មានឡើយ លោក សុធារ័ត្ន ដែលជាអ្នកជំនាញមានបទពិសោធន៍ជាច្រើនផ្នែកធនាគារ និងមីក្រូហិរញ្ញវត្ថុ បានណែនាំអំពីតួនាទីនៃប្រព័ន្ធរបាយការណ៍ឥណទានក្នុងការគ្រប់គ្រងហានិភ័យឥណទាន ដល់និស្សិតថ្នាក់អនុបណ្ឌិត និងបកស្រាយពីរបៀបដែល CBC ជួយគាំទ្រដល់ស្ថាប័នហិរញ្ញវត្ថុ សាធារណជន និងសេដ្ឋកិច្ចជាតិ។ លោកក៏បានបើកទទួលសំនួរផ្សេងៗ ពីសំណាក់ក្រុមនិស្សិត ទាក់ទងនឹងប្រតិបត្តិការការិយាល័យឥណទានក្នុងស្រុក និងនៅបណ្តាប្រទេសផ្សេងៗ សំនួរទាក់ទងនឹងប្រព័ន្ធរបាយការណ៍ឥណទាន របៀបអានរបាយការណ៍របស់ CBC និងរបៀបដែលស្ថាប័នហិរញ្ញវត្ថុប្រើប្រាស់របាយការណ៍នេះប្រកបដោយប្រសិទ្ធភាព។
គួរបញ្ជាក់ថា ការិយាល័យឥណទានកម្ពុជា (CBC) គឺជាក្រុមហ៊ុនឈានមុខគេ ក្នុងការផ្តល់នូវសេវាព័ត៌មានហិរញ្ញវត្ថុ ឧបករណ៍វិភាគទិន្នន័យ និង របាយការណ៍ឥណទាន ទៅដល់ស្ថាប័នហិរញ្ញវត្ថុទាំងអស់ ក៏ដូចជាអ្នកប្រើប្រាស់ឥណទានទូទៅ នៅក្នុងប្រទេសកម្ពុជា។ ការិយាល័យឥណទានកម្ពុជា (CBC) ជួយដល់អតិថិជន និង សមាជិករបស់ខ្លួនទាំងអស់ ក្នុងការគ្រប់គ្រងហានិភ័យ និង ធ្វើការសម្រេចចិត្តហិរញ្ញវត្ថុបានឆាប់រហ័ស។
