សិក្ខាសាលាស្ដីអំពី “ការគ្រប់គ្រងហានិភ័យឥណទានតាមរយៈប្រព័ន្ធចែករំលែកព័ត៌មានឥណទាន”
កាលបរិច្ឆេទផ្សាយ: ថ្ងៃព្រហស្បតិ៍ វិច្ឆិកា 30th, 2017នាព្រឹកថ្ងៃទី ៣០ ខែ វិច្ឆិកា ឆ្នាំ២០១៧ កន្លងទៅ នៅសាកលវិទ្យាល័យជាតិគ្រប់គ្រង មានការប្រារព្ធកម្មវិធីសិក្ខាសាលា ស្ដីអំពី “ការគ្រប់គ្រងហានិភ័យឥណទានតាមរយៈប្រព័ន្ធចែករំលែកព័ត៌មានឥណទាន” ដោយមានការអញ្ជើញចូលរួមក្រោមអធិបតីភាពរបស់លោក អឿ សុធារ័ត្ន ប្រធាននាយកប្រតិបត្តិ នៃការិយាល័យឥណទានកម្ពុជា លោក លន់ សំអុល អនុប្រធាននាយកដ្ឋានត្រួតពិនិត្យ និងឯកសា ធនាគារជាតិ នៃកម្ពុជា និង លោក សេង ប៊ុនធឿន សាកលវិទ្យាធិការរង នៃសាកលវិទ្យាល័យជាតិគ្រប់គ្រង លោក ប៉ាក សិរីវឌ្ឍនា ទីប្រឹក្សារសាជីវកម្មហិរញ្ញវត្ថុអន្តរជាតិ ព្រមទាំងគណអធិបតីនៃស្ថាបន័ខាងលើ និង លោកគ្រូ អ្នកគ្រូ រួមទាំងប្អូនៗនិស្សិត ដែលកំពុងសិក្សា ជំនាញគណនេយ្យ ទីផ្សារ ធនាគារ គ្រប់គ្រង និង សេដ្ឋកិច្ច សរុបជាង ២៥០នាក់ ។
គោលបំណងនៃការបង្កើតអោយមានកម្មវិធីសិក្ខាសាលានេះគឺដើម្បីចែករំលែកចំណេះដឹង និងអាចផ្សារភ្ជាប់ទ្រឹស្ដីប្អូនៗនិសិ្សតដែលកំពុងសិក្សានៅសាលា ទៅនឹងការអនុវត្តន៍ជាក់ស្ដែងក្នុងទីផ្សារ និងលើកកម្ពស់ការយល់ដឹងអំពីការិយាល័យឥណទានកម្ពុជា និងជាពិសេសផ្ដល់ជាបំណិនបន្ថែមដល់ប្អូនៗនិសិ្សតដើម្បីបង្កើនប្រសិទ្ធភាពការងារ និងរូមគ្នាអភិវឌ្ឍន៍សេដ្ឋកិច្ចកម្ពុជាក្នុងពេលអនាគត។
គួរបញ្ជាក់ថា ការិយាល័យឥណទានកម្ពុជា តែងតែបានចូលរួមជាប្រចាំក្នុងការបង្កើតឱ្យមានសិក្ខាសាលាចែករំលែកចំណេះដឹងផ្សេងៗ ក្នុងគោលបំណងលើកកម្ពស់ការយល់ដឹងផ្នែកឥណទាន និងចូលរួមជាមួយក្រសួងអប់រំ យុវជន និងកីឡា ដើម្បីបង្កើនគុណភាពអប់រំ តាមរូបភាពនៃការអប់រំក្រៅប្រព័ន្ធ ដែលជាផ្នែកមួយដ៏សំខាន់ក្នុងការជួយពង្រឹងសមត្ថភាពនិស្សិត ដើម្បីត្រៀមខ្លួនរួចរាល់ក្នុងការចាប់យកឱកាសការងារក្នុងពេលដ៏ខ្លីខាងមុខ ព្រមទាំងជាផ្នែកមួយយ៉ាងសំខាន់ក្នុងការជួយដល់ការអភិវឌ្ឍន៍ប្រទេសជាតិផងដែរ។
