សិក្ខាសាលាស្ដីអំពី “ការគ្រប់គ្រងហានិភ័យឥណទានតាមរយៈប្រព័ន្ធចែករំលែកព័ត៌មានឥណទាន” នៅសាកលវិទ្យាល័យកម្ពុជា
កាលបរិច្ឆេទផ្សាយ: ថ្ងៃពុធ សីហា 22nd, 2018
នាថ្ងៃទី ១៦ ខែ សីហា ឆ្នាំ២០១៨ កន្លងទៅ នៅសាកលវិទ្យាល័យកម្ពុជា មានការប្ររព្ធបានប្រារព្ធកម្មវិធីសិក្ខាសាលា ដែលរៀបចំឡើងដោយ ការិយាល័យឥណទានកម្ពុជា ដោយរួមសហការជាមួយសាកលវិទ្យាល័យកម្ពុជា លើប្រធានបទស្ដីអំពី “ការគ្រប់គ្រងហានិភ័យឥណទានតាមរយៈប្រព័ន្ធចែករំលែកព័ត៌មានឥណទាន”។ សិក្ខាសាលានេះមានការអញ្ជើញចូលរួមក្រោមអធិបតីភាពរបស់លោក អឿ សុធារ័ត្ន ប្រធាននាយកប្រតិបត្តិ នៃការិយាល័យ ឥណទានកម្ពុជា និង លោកស្រី Ms. Gina V.Lopez សាកលវិទ្យាធិការរង នៃសាកលវិទ្យាល័យកម្ពុជា។ សិក្ខាសាលានេះក៏មានការចូលរួមរបស់លោកសាស្ត្រាចារ្យ និងនិស្សិតជាច្រើនកុះករសរុបជាង ២០០នាក់ ដែលកំពុងសិក្សានៅសាកលវិទ្យាល័យកម្ពុជាជំនាញ គណនេយ្យ ទីផ្សារ ធនាគារ និង សេដ្ឋកិច្ច។
គោលបំណងនៃការបង្កើតអោយមានកម្មវិធីសិក្ខាសាលានេះគឺដើម្បីចែករំលែកចំណេះដឹង និងអាចផ្សារភ្ជាប់ទ្រីស្ដីដែលប្អូនៗនិសិ្សតដែលបានសិក្សានៅសាលា ទៅនឹងការអនុវត្តន៍ជាក់ស្ដែងក្នុងទីផ្សារ និងលើកកម្ពស់ការយល់ដឹងពីការិយាល័យឥណទានកម្ពុជា ការគ្រប់គ្រងហានិភ័យឥណទានតាមរយៈប្រព័ន្ធចែករំលែកព័ត៌មានឥណទាន និងជាពិសេសផ្ដល់ជាបំណិនបន្ថែមដល់ប្អូនៗនិសិ្សតដើម្បីបង្កើនប្រសិទ្ធភាពការងារ និងរូមគ្នាអភិវឌ្ឍន៍សេដ្ឋកិច្ចកម្ពុជាក្នុងពេលអនាគត។ លើសពីនេះ សិក្ខាសាលាក៏មានគោលបំណងលើកកម្ពស់សកម្មភាពជួយសង្គម និងសកម្មភាពមនុស្សធម៌ ហើយចូលរួមជាមួយ ក្រសួងអប់រំ យុវជន និងកីឡា ដើម្បីបង្កើនគុណភាពអប់រំ តាមរូបភាពនៃការអប់រំក្រៅប្រព័ន្ធ ដែលជាផ្នែកមួយដ៏សំខាន់ក្នុងការជួយពង្រឹងសមត្ថភាពនិស្សិត ដើម្បីត្រៀមខ្លួនរួចរាល់ក្នុងការចាប់យកឱកាសការងារក្នុងពេលដ៏ខ្លីខាងមុខ។
គួរបញ្ជាក់ថាការិយាល័យឥណទានកម្ពុជា តែងតែបានចូលរួមជាប្រចាំក្នុងសកម្មភាព មនុស្សធម៌ កីឡា និងសិក្ខាសាលាចែករំលែកចំណេះដឹងផ្សេងៗផងដែរ។
