ថ្ងៃទី ១៣ ខែ កក្កដា ឆ្នាំ ២០១៧ ការិយាល័យឥណទានកម្ពុជា បានផ្សព្ធផ្សាយជាផ្លូវការ នូវរបាយការណ៍ “ស្ថានភាពឥណទាននៅ កម្ពុជាសម្រាប់ឆ្នាំ ២០១៦” ក្នុងគោលបំណងបង្កើនការយល់ដឹងអោយកាន់តែទូលំទូលាយ អំពីស្ថានភាពឥណទាននៅកម្ពុជា ដែលអាចប្រើប្រាស់ជាឯកសារជំនួយសម្រាប់ស្ថាប័នសាធារណៈ និង ស្ថាប័នឯកជន ក្នុងការវិភាគពីស្ថានភាពឥណទាន ដូចជា ចំនួនប្រជាជនដែលទទួលបានឥណទាន បរិមាណឥណទានដែលបានខ្ចី និង កម្រិតអតិថិជនដែលមានការយឺតយ៉ាវលើសពី ៩០ថ្ងៃ ក្នុងការសងប្រាក់ នៅតាមខេត្តនីមួយៗ និងទូទាំងប្រទេស ព្រមទាំងដាក់ចេញនូវវិធានការណ៍ឥណទាន និង គោលនយោបាយសមស្របណាមួយ។
ក្នុងរយៈពេលជាងមួយទសវត្សរ៍ចុងក្រោយនេះ វិស័យធនាគារនិងមីក្រូហិរញ្ញវត្ថុបានរីកចម្រើនគួរឱ្យកត់សម្គាល់ ដោយបានទាក់ទាញវិនិយោគិនមកធ្វើការវិនិយោគជាច្រើន ហើយបានបម្រើសេវាដល់ប្រជាជននៅតាមជនបទ ជាពិសេសប្រជាជនក្រីក្រ ។ ជាក់ស្តែង ក្នុងអំឡុងឆ្នាំ២០០៤-២០១៦ ចំនួនគ្រឹះស្ថានធនាគារនិងមីក្រូហិរញ្ញវត្ថុបានកើនឡើងពី ១០ ទៅ ៧១ គ្រឹះស្ថាន ជាមួយនឹងការពង្រីកបណ្តាញពី ១២.៨៣៣ ទៅដល់ ១៤០.១២១ នៅតាមស្រុក ភូមិ និងឃុំ ទូទាំងប្រទេស ដែលធ្វើឱ្យការផ្តល់សេវាកើនឡើងរហូតដល់ទីជនបទ ។
គិតត្រឹមខែធ្នូ ឆ្នាំ២០១៦ គ្រឹះស្ថានជាសមាជិកទាំងនេះ បានផ្តល់ឥណទានសរុបមានចំនួន១២,៥ ប៊ីលាន ដុល្លារអាមេរិក ដល់ប្រជាជនចំនួន ២.០៩៧.៨៥៣ នាក់ នៅក្នុង ២៥ ខេត្ត-ក្រុង។ ក្នុងនោះ រាជធានីភ្នំពេញមានបរិមាណឥណទានច្រើនជាងគេចំនួន ៥,៣ ប៊ីលាន ដុល្លារអាមេរិក ស្មើនឹង ៤២,៦% នៃឥណទានសរុបទូទាំងប្រទេស និងមានអ្នកខ្ចីប្រាក់ចំនួន ២៣២.១៣៣ នាក់ បន្ទាប់មកគឺខេត្តសៀមរាបមានបរិមាណឥណទានចំនួន ៧៨៥,៧ លាន ដុល្លារអាមេរិក ស្មើនឹង ៦,៣% ដែលមានអ្នកខ្ចីប្រាក់ចំនួន ១៣៤,៧០២ នាក់ ខេត្តកណ្តាលមានបរិមាណឥណទានចំនួន ៧៣៤,៥ លានដុល្លារអាមេរិក ស្មើនឹង ៥,៩% ដែលមានអ្នកខ្ចីប្រាក់ចំនួន ១៨១,៨៣៥ នាក់ និង ខេត្តបាត់ដំបងមានបរិមាណឥណទានចំនួន ៦៧៦,៣ លានដុល្លារអាមេរិក ស្មើនឹង ៥,៤% ដែលមានអ្នកខ្ចីប្រាក់ចំនួន ១៣៧.៩៥៣ នាក់ ។ លើសពីនេះ ទិន្នន័យបានបង្ហាញថា តំបន់ណាដែលមានទំហំឥណទានធំ តំបន់នោះមានសេដ្ឋកិច្ចកាន់តែធំនិងរីកចម្រើន ដែលសរបញ្ជាក់ថាឥណទានបានរួមចំណែកយ៉ាងសំខាន់ក្នុងការជម្រុញសេដ្ឋកិច្ចតំបន់ឲ្យរីកចម្រើនកាន់តែឆាប់រហ័ស ។
ជាក់ស្តែង រាជធានីភ្នំពេញទទួលបានប្រាក់កម្ចីសរុបច្រើនជាងគេប្រមាណលើសពី ១ ប៊ីលានដុល្លារអាមេរិក បន្ទាប់មក គឺខេត្តកណ្តាលនិងសៀមរាប ដែលមានទឹកប្រាក់កម្ចីក្នុងចន្លោះ ៧០០ លាន ទៅ ១ ប៊ីលានដុល្លារអាមេរិក ។ ចំណែកឯខេត្តបាត់ដំបងនិងកំពង់ចាម ទំហំកម្ចីមានចំនួនចន្លោះពី ៥០០ ទៅ ៧០០ លាន ដុល្លារអាមេរិក ។ ខេត្តដែលមានទឹកប្រាក់កម្ចីនៅទាបនៅឡើយ គឺខេត្តស្ទឹងត្រែង ព្រះវិហារ មណ្ឌលគីរី កែប ប៉ៃលិន និងកោះកុង ដែលមាន ទឹកប្រាក់ទាបជាង ១០០ លានដុល្លារអាមេរិក ។
បរិមាណឥណទានជាមធ្យមដែលគ្រឹះស្ថានធនាគារផ្តល់ដល់អតិថិជន ១នាក់ មានចំនួន ១២.៩០៩ ដុល្លារអាមរិក ហើយបរិមាណឥណទានជាមធ្យមដែលគ្រឹះស្ថានមីក្រូហិរញ្ញវត្ថុផ្តល់ដល់អតិថិជន ១នាក់ មានចំនួន ២.០៩៩ ដុល្លារអាមេរិក ។ ជាមួយគ្នានេះអតិថិជនដែលបានខ្ចីប្រាក់ពីគ្រឹះស្ថានតែមួយមាន ៨៣.១% ពីរគ្រឹះស្ថានមាន ១៣.៧% បីគ្រឹះស្ថានមាន ២.៨% និង ច្រើនជាងបីគ្រឹះស្ថានមាន ០,៤% ។
ចំពោះគុណភាពឥណទានដែលបានផ្តល់ទាំងនេះ ជារួមមានគុណភាពល្អដែលឆ្លុះបញ្ចាំងដោយអត្រាទាបនៃប្រាក់កម្ចីដែលអតិថិជនសងមិនទាន់ពេលដែលមានកម្រិតប្រមាណ ១,២៨% នៃឥណទានសរុប ។ ថ្វីត្បិតតែទំហំ ទឹកប្រាក់ខ្ចីមានភាពខុសគ្នាខ្លាំងនៅតាមបណ្តាខេត្តមួយចំនួនក្នុងប្រទេសក៏ដោយ ទិន្នន័យបានបង្ហាញថា កម្រិតអត្រានៃប្រាក់កម្ចីដែលអតិថិជនសងមិនទាន់ពេលមិនមានភាពខុសគ្នាឆ្ងាយទេ ។ ខេត្តដែលមានអត្រា ប្រាក់កម្ចីដែលអតិថិជនសងមិនទាន់ពេលខ្ពស់ជាងគេគឺខេត្តត្បូងឃ្មុំ (២,៨៧%) រតនគីរី (២,៣២%) ពោធិ៍សាត់ (២,២៩%) ព្រះវិហារ (២,១៥%) និងឧត្តរមានជ័យ (២,១៣%) ។ លើសពីនេះ ប្រសិនបើ ពិនិត្យមើលពីចំនួនអតិថិជនដែលសងមិនទាន់ពេលនៅតាមបណ្តាខេត្តទាំងនេះ គឺមានចំនួនតិចជាង ១.៥០០ នាក់ ក្នុងខេត្តនីមួយៗ គឺមានកម្រិតទាបជាងមធ្យមភាគនៃចំនួនអតិថិជនដែលសងមិនទាន់ពេលទូទាំងប្រទេស (១.៥០៦នាក់) ។ ចំនួនអតិថិជនតិចនេះក៏បញ្ជាក់ថែមទៀតថាទោះបីជានៅក្នុងខេត្តមួយចំនួនមានអត្រា ប្រាក់កម្ចីដែលអតិថិជនសងមិនទាន់ពេលមានកម្រិតខ្ពស់បន្តិចក្តី ប៉ុន្តែបើគិតពីចំនួនប្រជាជនគឺមានចំនួនតិចតួចទេ ។ គួរបញ្ជាក់ថាចំពោះខេត្តដែលផ្តល់ឥណទានច្រើនជាងគេ ១០ ដំបូង ដែលក្នុងនោះ រួមមាន ភ្នំពេញ សៀមរាប កណ្តាល បាត់ដំបង និងកំពង់ចាម ជាដើម មានសមាមាត្រផ្តល់ឥណទានប្រមាណ ៨២% នៃឥណទានសរុបទូទាំងប្រទេស គឺមានអត្រាប្រាក់កម្ចីដែលអតិថិជនសងមិនទាន់ពេលត្រឹម ១% ប៉ុណ្ណោះ ។
លោក អឿ សុធារ័ត្ន ប្រធាននាយកប្រតិបត្តិស្តីទី នៃការិយាល័យឥណទានកម្ពុជា មានប្រសាសន៍ថា ជារួមស្ថានភាពនៃវិស័យធនាគារនិងហិរញ្ញវត្ថុនៅកម្ពុជាមានការរីកចម្រើនគួរឲ្យកត់សម្គាល់ ដោយបានរួមចំណែក អភិវឌ្ឍសកម្មភាពសេដ្ឋកិច្ច តាមរយៈការផ្តល់ឥណទាននៅតាមបណ្តាខេត្ត-ក្រុង ទូទាំងប្រទេស ហើយការលើកកម្ពស់ការយល់ដឹងរបស់ប្រជាពលរដ្ឋលើការប្រើប្រាស់សេវាហិរញ្ញវត្ថុ គឺមានសារៈសំខាន់ណាស់ក្នុងការជំរុញនិងបង្កើនប្រសិទ្ធភាពនៃការប្រើប្រាស់ឥណទាន ។
សម្រាប់ព័ត៌មានលម្អិត សូមទាញយករបាយការណ៍នៅទីនេះ CBC’s Loan Situation Report 2016 ។
ក្រុមហ៊ុន ក្រេឌីត ប្យួរ៉ូ ខេមបូឌា គឺជាក្រុមហ៊ុនឈានមុខគេ ក្នុងការផ្តល់នូវសេវាព័ត៌មានហិរញ្ញវត្ថុ ឧបករណ៍វិភាគទិន្នន័យ និង របាយការណ៍ឥណទាន ទៅដល់ស្ថាប័នហិរញ្ញវត្ថុទាំងអស់ នៅក្នុងប្រទេសកម្ពុជា។