នាថ្ងៃទី ៥ ខែឧសភាឆ្នាំ ២០១៨ ការិយាល័យឥណទានកម្ពុជាបានរៀបចំវគ្គបណ្តុះបណ្តាលស្តីពី “គោលការណ៍ទូទៅសម្រាប់របាយការណ៍ឥណទាន” ដោយមានការចូលរួមពីបុគ្គលិក និងថ្នាក់ដឹកនាំការិយាល័យឥណទានកម្ពុជាទាំងអស់។ វគ្គបណ្តុះបណ្តាលនេះត្រូវបានចូលរួមធ្វើបទបង្ហាញផ្ទាល់ដោយ លោក អឿ សុធារ័ត្ន ប្រធាននាយកប្រតិបត្តិនៃការិយាល័យឥណទានកម្ពុជា ដើម្បីផ្តល់ជាចំណេះដឹងជូនបុគ្គលិករបស់ខ្លួន ស្តីអំពីគោលការណ៍ និងប្រព័ន្ធនៃរបាយការណ៍ឥណទាន ដែលវាជាផ្នែកដ៏មានសារៈសំខាន់ក្នុងការបង្កើតហេដ្ឋារចនាសម្ព័ន្ធហិរញ្ញវត្ថុ ដ៏មានប្រសិទ្ធិភាព ដែលជួយសម្រួលដល់ដំណើរការផ្តល់ប្រាក់កម្ចីរបស់សមាជិករបស់ខ្លួន និងពង្រីកលទ្ធភាពទទួលបានឥណទានរបស់ប្រជាពលរដ្ឋ។
ប្រព័ន្ធរបាយការណ៍ឥណទានក៏ជួយបំពេញនូវតំរូវការរបស់អ្នកផ្តល់កម្ចី ដែលចង់បានព័ត៌មានត្រឹមត្រូវ និងប្រកបដោយភាពជឿទុកចិត្ត ដើម្បីប្រើប្រាស់ ក្នុងការកាត់បន្ថយហានិភ័យក្នុងការផ្តល់ប្រាក់កម្ចី និងការខាតបង់ប្រាក់កម្ចី។ ប្រព័ន្ធទាំងនេះមានសក្តានុពលទៅលើឥរិយាបថអ្នកប្រើប្រាស់ឥណទាន ដែលជួយពួកគេឲ្យទទួលបានឥណទានងាយស្រួលជាងមុន តាមរយៈប្រវត្តិឥណទានល្អរបស់ពួកគាត់ផងដែរ។ នៅក្នុងកម្រិតម៉ាក្រូ និងមីក្រូ ប្រព័ន្ធរបាយការណ៍ឥណទានជួយដល់ អាជ្ញាធរគ្រប់គ្រងហិរញ្ញវត្ថុ តាមរយៈទិន្ន័យដែលឈានទៅរកការជួយលើកកម្ពស់ភាពរីកចំរើននៃវិស័យហិរញ្ញវត្ថុប្រកបដោយស្ថេរភាព នៅទូទាំងប្រទេស។
ការិយាល័យឥណទានកម្ពុជា តែងមានការប្រុងប្រយ័ត្នខ្ពស់ ក្នុងការបម្រើសមាជិករបស់ខ្លួន ជាមួយនឹងប្រព័ន្ធរបាយការណ៍ឥណទានដែលមានលក្ខណៈគ្រប់ជ្រុងជ្រោយ និងប្រសិទ្ធភាពខ្ពស់ សម្រាប់ធានានូវនិរន្តភាពនៃដំណើរការឥណទានដែលល្អ និងដើម្បីចូលរួមចំណែកជួយដល់ការអភិវឌ្ឍសេដ្ឋកិច្ចជាតិ។