អណ្តូងទឹក និងបង្គន់ចំនួន ២០ ត្រូវបានផ្តល់ជូនដល់ប្រជាពលរដ្ឋក្រីក្រខេត្តព្រៃវែង
កាលបរិច្ឆេទផ្សាយ: ថ្ងៃច័ន្ទ ធ្នូ 25th, 2017នាថ្ងៃទី២៣ ខែធ្នូ ឆ្នាំ២០១៧ ថ្នាក់ដឹកនាំ និងបុគ្គលិកការិយាល័យឥណទានកម្ពុជា (ស៊ីប៊ីស៊ី) បានចុះជួយធ្វើបន្ទប់ទឹក និងអណ្តូងសរុបចំនួន ២០ សម្រាប់ប្រជាពលរដ្ឋក្រីក្រ ៤៥ គ្រួសារ រស់នៅសង្កាត់កំពង់លាវ ក្រុងព្រៃវែង ខេត្តព្រៃវែង។ កម្មវិធីនេះបង្កើតឡើងក្នុងគោលបំណងផ្តល់ភាពងាយស្រួលក្នុងការទទួលបានប្រភពទឹកស្អាត និងលើកកម្ពស់សុខភាព ព្រមទាំងអនាម័យ និងការពារជំងឺចំលងក្នុងសហគមន៍ផងដែរ។
កម្មវិធីនេះមានការចូលរួមពី លោក អឿ សុធារ័ត្ន ប្រធាននាយកប្រតិបត្តិ ការិយាល័យឥណទានកម្ពុជា អាជ្ញាធដែនដី ថ្នាក់ដឹកនាំ និង បុគ្គលិកការិយាល័យឥណទានកម្ពុជា និង អង្គការស្រលាញ់កម្ពុជា រួមទាំងប្រជាពលរដ្ឋសរុបជាង ១០០ នាក់។
គួរបញ្ជាក់ថាការិយាល័យឥណទានកម្ពុជា ត្រូវបានចាប់ផ្តើមដំណើរការជាផ្លូវការនាថ្ងៃទី១៩ ខែមីនា ឆ្នាំ២០១២ ដោយមានការផ្ដួចផ្ដើមពី ធនាគារជាតិ នៃកម្ពុជា សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងក្រុមប្រឹក្សាហិរញ្ញវត្ថុអន្តរជាតិ។ ការិយាល័យឥណទានកម្ពុជា ជាក្រុមហ៊ុនឈានមុខគេ ក្នុងការផ្តល់នូវសេវាព័ត៌មានហិរញ្ញវត្ថុ ឧបករណ៍វិភាគទិន្នន័យ និង របាយការណ៍ឥណទាន ទៅដល់ស្ថាប័នហិរញ្ញវត្ថុទាំងអស់ នៅក្នុងប្រទេសកម្ពុជា។ ក្រុមហ៊ុនតែងបានចូលរួមជាប្រចាំក្នុងសកម្មភាពមនុស្សធម៌ កីឡា ការអប់រំដល់និស្សិតតាមសាកលវិទ្យាល័យរដ្ឋ និងឯកជន ការជួយគាំទ្រ និងធ្វើអោយប្រសើរឡើងនូវវិស័យហិរញ្ញវត្ថុកម្ពុជា និងការចូលរួមលើកកម្ពស់សុខភាពរបស់ប្រជាជន ព្រមទាំងការជួយឧបត្ថម្ភក្នុងរូបភាពជាច្រើនផ្សេងទៀត។
